МИЛӘШ АЧЫСЫ

Капка ачылып ябылган тавышны ишеткәч: “И Ходаем, тагын шул Сәвия карчык кереп киләдер инде. Керсә чыга белми, йөри шунда эш калдырып”, - дип, сөйләнә-сөйләнә Әлфия ишеккә таба атлады.

Ашыкмый шул Сәвия әби: өйдә көтеп утырган кешесе, умырып эшләрдәй эше юк. Ялларда балалары килгәч, җыештырып, ашарына әзерләп китәләр. Балалары күпме генә үзләренә чакырсалар да, алар янына китеп яшисе килми аның. “Яшәгән кадәр яшәмәм, үз йортымда җан бирергә язсын,– ди дә, аннан үзенчә матур гына кеткелдәп көлеп: Бергә булыйк, аерым торыйк, – дип өстәп куя.

Әлфия эченнән генә сукранып, күрше әбигә болдырдан йортка керергә булышты. “Сәвия карчыкны, бәлки, кереп йөрүеннән биздерермен”,- дип болдыр баскычларын быел иреннән махсус рәвештә текә итеп эшләткән булган иде ул. Юкка гына булды тырышуы. Җитмәсә, Әлфиягә тагын бер мәшәкате өстәлде: Сәвия әбинең кеше ярдәменнән башка текә күтәрмәләрне “җиңәрлек” егәре юк иде. - Исәнме, Әлфия балам, син төшке ашка кайтканда кереп чыгыйм әле, дип кердем. Атна уртасында балалар белән сөйләшеп алмасам, тынычлап йоклый алмыйм.

– Сәвияттәй, балаларыңнан телефон керттерер идең йортыңа, кешегә кереп җәфаланып йөргәнче. Мин дә бит яшь кеше түгел хәзер, кеше көен көйләп йөрергә. Өч айдан пенсияга чыгам, Аллаһы бирсә! - И-и-и Әлфия балам, сиңа да илле биш туламыни әле?

Шуннан соң какча куллары белән яулыгын рәтләгәндәй итеп: “Кызлар кебек бит әле син, сөбханалла, күзләр тимәсен!”, - дип, гадәттәгечә, телефон куелган өстәл янындагы урындыкка килеп утырды. Бер мизгелгә аның күз алдыннан күрше район кызы Әлфиянең килен булып төшкән вакытлары, кайнана тиешле кешенең бик тә усал булып, Әлфияне җәберләүләре, шул чагында Сәвияттәйләрнең Әлфиягә терәк булып яшәүләре, бәбәй тапкан саен, кырык көнгә кадәр мунча ягып юындырулары, йорт тергезгәндә акчалата ярдәм итеп торулары, тагын шунда әллә нинди эшләре сызылып кына үтеп китте.

Сәвияттәйнең: “Әлфия балам, ачуланма инде, телефон кертергә үзем каршымын. Атнасына бер булса да сезне урап чыксам, аякларым язылып китә”,- дигәнен ишетмәмешкә салышып, Әлфия аш-су бүлмәсендә табак-савыт шалтырата башлады.

Әлфияне пенсиягә озату мәҗлесен ике атна рәттән уздырдылар: беренче табынга бергә эшләгән коллективын, ә икенчесенә туганнарын җыйдылар. Туганнарын җыясы атна уртасында Сәвияттәй кинәт кенә, йоклаган җиреннән фани дөньяны ташлап китеп барды. Ире Радик: “Әллә кичереп торабызмы бер-ике атнага мәҗлесне, күршедән генә олы мәет чыкты”, - дисә дә, Әлфия ризалашмады.

– Аннан бер калса, кала инде ул, тимерне кызуында сугарга кирәк!

Радикның: “Соңгы атналарда телефонга да керми башлаган иде мәрхүмә”, - дигәненә Әлфия бер сүз дә эндәшмәде.

Мәҗлесләр бик күңелле, мул узды. Тәнәфесләрдә Әлфия: “Картлыгымың яшьлегенә генә керәм әле”, – дип, очынып-очынып рәхәтләнеп биеде. Тик торырга яратмаган, энергиясе ташып торган Әлфиянең пенсиягә чыккач, планнары, кем әйтмешли, “наполеонча” иде. Тик “Аллаһы боерса” дияргә онытканмы, әллә башка сәбәплеме, пенсияга чыккан беренче айны ук Әлфия аяклары белән җәфалана башлады. Шифаханәләрнең дә файдасы булмады: өй эчендә көчкә генә атлап йөрердәй булып китте. Ишек алдына чыгып йөрергә җайлы булсын өчен ире Радиктан текә күтәрмәләрен дә сүттереп ыргыттырды.

Беркөнне, әбиләр чуагы башлангач, кызышып китеп, култык таякларына таянып, Әлфия капка алларына чыгып утырды. Күзе Сәвияттәйнең, өй алдында төште. Кып-кызыл тәлгәшләр эленгән, ботакларын күтәрә алмыйча утырган миләш агачы! Тел очына миләш ачысы килдеме, Сәвияттәйне искә төшердеме – Әлфия үзе дә сизмәстән балаларча үксеп елап җибәрде.

Люция ӘБЛИЕВА

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (3)
Осталось символов:
  • 5 март 2020 - 14:28
    Без имени
    Элек Курше эбилэр кереп уткэннэрен сойлилэр,балаларга куз,колак була,бурычка акча биреп торалар иде.Шулар ярдэмендэ гаилэлэр тотороклы булды.Бик сагынам мин курше эбиемне,бердэ купсенмэдем,авырыксынмадым.Урны жэннэттэ булсын.Шунын рэхмэте бн куп сынау,авырлыкларны жинеп,исэн_имин яшимендер дип дога кылам.)))
  • 16 февраль 2020 - 07:29
    Без имени
    Начало красивое описание, но жалко окончание резкое. Чётко можно было довести закон бумеранга образно.
  • 15 февраль 2020 - 10:14
    Без имени
    Очень понравился рассказ. И читается легко. Жизненно
Шәп укыла
  • 13 октябрь 2020 - 10:20
    ЯНГАН ГОМЕР Уналты чакрым ераклыктагы авылдан үзен соратып килгән Ибраһимга Мөслимә, яше җитеп узып китсә дә, ата-анасының басымы аркасында тормышка чыгарга ризалык бирде. Сайланып торыр урында, егерме биш яшеңдә соратып килүче булган өчен рәхмәт әйт әле! Апаларыннан узып тормышка чыгарга базмыйча, ике сеңлең каңгыраеп утырганын онытма! Хатын аертса ни, тормышта булмый торган хәл түгел! Димәк, хатыны иренә ярап тора белмәгән!
    1043
    0
    7
  • 12 октябрь 2020 - 13:35
    РЕЗЕДА ХАБИБУЛЛИНА ШИГЫРЬЛӘРЕ Сагындырды, әнием, кайтам әле, Очрашулар ешрак, күп булсын. Күңелебездә туган рәхмәт хисе Сезгә хөрмәт аша чагылсын.
    554
    0
    4
  • 10 октябрь 2020 - 12:07
    «ДУСТЫМНЫ ӘТИ-ӘНИСЕ КЫЙНЫЙ» «Якын дустымны әти-әнисе кыйный. Алар начар гаилә түгел, эчмиләр, тартмыйлар, уңган, тырыш кешеләр. Ник алай эшләүләрен һич аңламыйм. Берәр эшне алар теләгәнчә башкармаса да, сеңлесе еласа да кыйныйлар икән. Кул күтәреп, кешене тәрбияләп булмый бит... Дустыма ничек ярдәм итим?»
    433
    0
    1

Блоглар
  • МУСА ҖӘЛИЛ ИСЕМЕНДӘГЕ КӨРӘШ ЯРЫШЛАРЫ-2020 (ФОТОРЕПОРТАЖ)
  • CLUBTURBO WINTER DRIFT CUP ИКЕНЧЕ ЭТАП: ФОТОРЕПОРТАЖ
  • «ӘЙДӘ, ШАЯРТ»: ФИНАЛ
  • ТАТАР ИҖАДИ КОМАНДАЛАРЫ АРАСЫНДА МИНИ-ФУТБОЛ
  • РУБИН–ДИНАМО 0:1 (ФОТОРЕПОРТАЖ)
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019