ЯҢА МӘКТӘПТӘ СЫНАТМАС ӨЧЕН...

Яңа уку елы кайберәүләр өчен яңа мәктәпләрдә башланачак. Яңа мәктәп ул яңа бина гына түгел, ә икенче укытучылар, сыйныфташлар, дуслар. Мәктәп алыштырганда ничек югалып калмаска? Нинди кагыйдәләрне истә тотарга кирәк? Йолдызлардан сорыйк әле.

Ландыш Нигъмәтҗанова, җырчы:


– Мәктәпне төрле сәбәпләр аркасында биш тапкыр алыштырырга туры килде. Хәтта Испаниядә дә укыдым. Шуңа күрә белем йортлары арасындагы аерма миңа бик нык сизелде. Испаниядә уку күңелле, җиңел булып истә калган. Ә бездә балалар мәктәпкә мәҗбүри йөри дисәң дә була: мәктәпкә киләсең, көне буе укыйсың, җитмәсә өй эшләре төяп җибәрәләр... Мәктәп алыштырулар минем өчен авыр булмады. Юлларымда гел яхшы кешеләр очрады. Бу бәлки үземнең холкыма да бәйледер. Мәктәп алыштыручыларга үзләре булып калуларын һәм аралашучан булуларын телим.

Лилия Кадыйрова, «Татар радиосы» диджее:


– Беренче тапкыр мәктәпне гаилә хәле буенча алыштырдым. Икенчесендә ул мәктәптә кирәкле белем бирмәүләрен аңлап, әти-әнигә дә әйтеп тормыйча яңа мәктәпкә күчтем. Яңа мәктәптә башта белем җитми иде. Зур гына күләмдә материалны үзлегемнән өйрәндем. Ә иң рәхәте – укытучыларның укучыларга хөрмәт белән каравы, «сез» дип эндәшүе булды. Уку елын икенче мәктәптә башлаучыларга миннән шундый киңәш: таш атканга аш атыгыз. Яңа компанияга кереп китү авыррак, әлбәттә. Тик һәрнәрсәгә ачкыч табып була. Башкаларга ярдәм кулы сузыгыз, мин-минлегегезне беразга булса да онытып торыгыз.

Ризат Рамазанов, җырчы:


– Мин аягымны авырттырып өченче сыйныфка кадәр хастаханәдә яттым. Уку да минем өчен шунда булды. Аннары терелгәч кенә мәктәпкә бардым. Мин хастаханәдә татарча гына укыдым, ә мәктәптә русча укыйлар иде. Иң авыры шул булды. Тагын коллективка кереп китү дә авыр булды. Мәсәлән, музыка дәресендә кыз һәм малай парлашып җырлыйсың бит, шунда классташ кызлар минем белән парлашып басмыйлар иде. Тик шулай да аннары дуслаштык. Яңа кешеләргә ияләшү өчен вакыт кирәк. Шулай ук үзегез булып калыгыз. Кемгәдер ошарга тырышырга кирәкми. Күңелегездә сез нинди, тормышта да шундый булыгыз.

Илгәрәй, җырчы:


– Мәктәпне алыштыру психологик яктан бик авыр. Әмма һәрнәрсәнең начар ягы булган кебек, яхшы ягы да бар. Яңа коллективка кереп китүне, әйләнә-тирәне алыштыруны бер тапкыр кичергән кешегә киләчәктә җиңелрәк булачак. Бу очракта да шулай. Күп нәрсә кешенең үзеннән тора. Шулай ук балага бирелгән тәрбия дөрес булырга тиеш. Яңа мәктәпкә күчкәндә әти-әниләр балалар янында булсын иде. Иң мөһиме: тынычлыгыгызны саклагыз!

Илгиз ШӘКҮРОВ

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
  • 26 май 2021 - 17:40
    САБАНТУЙГА КАРШЫ КИЧ Юлы уңарга тиеш бүген Нәргизәнең. Иртәдән болытлы торган күк йөзе, өйләдән соң кинәт ачылып китте дә, ялтырап кояш чыкты. Соңгы зачетын тапшырып, университет баскычларыннан йөгерә-йөгерә тукталышка ашыкты кыз. Хәзер тиз генә бүлмәсенә кереп, юл сумкасын алыр да, электричкага чыгар. Кыз җәлт кенә кул сәгатенә күз төшерде. Өлгерергә тиеш, электричка китәргә сәгатьтән артык вакыт бар әле.
    821
    0
    0
  • 31 май 2021 - 17:44
    ЗАМАНЧА КЫСТЫБЫЙ РЕЦЕПТЫ «Кыстыбый tatar-food» рестораннарының берсендә директор булып эшләүче Айнур Идиятулин белән «Чеп-чеби» кыстыбые әзерләдек. Аннан ашадык... Шундый тәмле булды! Серле рецептны сезнең өчен дип  язып та алдым. Уңайлырак булсын өчен фотога да төшердек. Рәхәтләнеп кулланыгыз!
    774
    0
    0
  • 2 июнь 2021 - 12:45
    «БЕТЧӘГӘ БАТТЫМ...» «Соңгы елда кисәк кенә бетчәгә баттым. Башта артык игътибар итмәгән идем, әмма хәзер бик борчыла башладым. Кешеләр белән аралашырга да читенсенәм. Гел бетчәләремә карап торалардыр кебек. Борчылуымны әнигә әйткән идем: «Бетә ул», -диде. Бетми бит... Түзеп, бетчәле килеш йөрергәмени инде хәзер?»
    544
    0
    0

Блоглар