УКЫТУЧЫГА КУПАЛЬНИКТА ФОТОГА ТӨШӘРГӘ ЯРЫЙМЫ?

Консерватив карашлы кешеләр, әлбәттә, “ярамый!” дип җавап бирер. Ә менә мәгариф өлкәсе хезмәткәрләре өчен махсус әзерләнгән әхлак кодексының яңа редакциясе мөгаллимнәргә интернетка купальниктан фото урнаштыруны тыймый.

Укытучыларның интернетта үз-үзен тоту кагыйдәләре язылган документны Россиянең Мәгърифәт министрлыгы һәм россиякүләм мәгариф хезмәткәрләре профсоюзы белгечләре әзерләгән. Хәзерге вакытта бу документның Россия төбәкләренә җибәрелгәнлеге дә билгеле.

Документның тулы атамасы - “Мәгариф тармагы хезмәткәрләре өчен һөнәри әхлак нормалары турында якынча нигезләмәләр”. Белгечләр аны мәктәптә норматив актлар, коллектив һәм тармак килешүләре төзегәндә кулланырга киңәш итә.

Бу – беренче шундый документ түгел. Әхлак кодексының иске варианты 2014 елда ук әзерләнгән булган. Быел исә мәгариф учреждениеләренә аның яңартылган вариантын тәкъдим иткәннәр.

УКЫТУЧЫЛАРНЫ ДОКУМЕНТ ЯКЛЫЙ

Әлеге документ турында зурлап сөйләмәсләр дә иде, мөгаен. Әмма, әхлак кодексының яңа басмасына яңа пункт өстәлгән. Ул укытучыларның интернетта үз-үзләрен тотышына бәйле. Пункт озын түгел. Укытучыларга бары тик “балаларның үсешенә, камилләшүенә зыян китерә торган мәгълүмат” урнаштыру гына тыела. Беренче чиратта, бу – порнография, суицид ысуллары, исерткеч эчемлекләр куллануны пропагандалау, әшәке сүзләр куллану һ.б.

– Кызганыч, узган уку елында укытучыларны  интернетта һөнәри этиканы бозуда гаепләү белән бәйле шау-шулы вакыйгалар еш булды. Спорт һәм дөрес яшәү рәвешен популярлаштыру белән шөгыльләнгән  мөгаллим эштән дә азат ителде, хәтта. Әлбәттә, без бу хәлләрдән читтә кала алмадык. Шуңа күрә иске нормалар урынына яңа документ булдыру карары кабул ителде, - дип белдерә Россиякүләм мәгариф профсоюзлары рәисе Галина Меркулова.

Җитәкче сүләренчә, купальникта төшкән фото берничек тә порнография була алмый. Шуңа күрә интернет белән бәйле әлеге яңа  пункт укытучыны гадел булмаган гаепләүләрдән  саклап калырга тиеш.

– Яңа басма цифрлы дөнья таләпләренә җавап бирә. Алай гына да түгел, документка укытучының һөнәри әхлак нормаларын бозу-бозмавын гадел һәм объектив итеп тикшерүгә хокукы булу турындагы пункт та өстәлде, - ди Галина Меркулова.

Моннан тыш, әлеге әхлак кодексында укытучылар өчен дресс-код та йомшара төшкән. Элегрәк укытучы “эшлекле стильдә” генә киенергә тиеш булса, хәзер исә аның тышкы кыяфәте бары тик “мәгариф программасы бурычларына туры килерлек дәрәҗәдә” булырга тиеш.

“БИК БӘХӘСЛЕ ДОКУМЕНТ...”

Без исә бу укытучылардан әлеге “әхлак документы” белән бәйле уй-фикерләрен сораштык.

Алена Иванова, 30 яшь, математика укытучысы:

Миңа калса, бу - бик шәп яңалык! Мәсәлән, мин Инстаграм челтәремә төрле матур фотолар урнаштырырга яратам. Ә йөзү – минем хобби!  Тик купальниктан фотолар куярга шүрли идем. “Килешми”, - дип уйлаганнан түгел. Нәкъ менә теге укытучылар белән булган хәлләр мине куркытты. Шуңа күрә тренировкаларымны кешегә күрсәтми идем. Укытучыларны ниндидер кысаларга кертү, әлбәттә, дөрес түгел! Аллага шөкер, җитәкчеләр моны аңлаган. Мең рәхмәт.

Лилия, 29 яшь, инглиз теле укытучысы:

Минем фикерем ике яклы. Беренчесе - бу минем тормыш, ни телим, шуны эшлим! Кеше сүзенә, фикеренә карамыйча яшим. Шәхси тормыш кагылгысыз! Икенчесе – тәрбия дигән әйбер дә бар бит әле. Бигрәк тә безгә, татарларга купальникта фотога төшеп, аны халыкка чыгару ярамый торган хәл. Бүген социаль челтәргә купальниктан фото урнаштырып, иртәгә әлеге фотоны күргән 20-30 укучы каршына чыгып басарга мин шәхсән оялыр идем. Тик ничек кенә булмасын, купальниктан фотога төшкән өчен мөгаллимне эштән алу гадел түгел дип саныйм. Ул бит мәктәп белән генә яшәми. Дуслары, танышлары, туганнары бар. Шуңа күрә бу очракта иң яхшысы, профильне мәктәп укучылары өчен ябып кую. Гомумән, 9 нчы сыйныфка кадәрге балаларга социаль челтәрләрне тыярга кирәк.

Алсу Зарипова, 35 яшь, тәрбияче:

– Миңа калса, бу шактый бәхәсле документ. Купальниктан фотога да төрлечә төшеп була бит. Шул ук вакытта күлмәктән дә фотога төрлечә төшәргә мөмкин. Шуңа күрә бу әхлак нормалары миндә ышаныч уятмый. Бик бәхәсле...

 

 

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
  • 27 март 2020 - 10:08
    ПАР БЕЛӘЗЕК Зөлхиҗҗә иртәгесен туган-тумача, дусларын, тирә-күршеләрен җыеп Коръән мәҗлесе уздырырга әзерләнә иде. Киләсе кунаклар инде чакырылган. Бик озак урын хастасы булып яткан әнисенең бакыйлыкка күчкәненә ике ел узып та киткән. Хәергә өләшәсе йомшак ак сөлгеләре күптән түрдәге тумбочка өстенә таслап куелган. Зөлхиҗҗә әнисе исән чакта да аңа гел ак төстәге күлмәкләр, яулыклар гына ала иде. Биш ел урында ятты карчык.
    4588
    0
    87
  • 18 март 2020 - 15:36
    ТӘҮГЕ МӘХӘББӘТ Ә мәхәббәт дигәнең буйга-сынга карыймы соң? Ул бит буйга гына түгел, яшькә дә карамый. Мәхәббәт үтмәслек киртәләр юк. Ә тәүге сөю бигрәк тә...Ә Зөлфәтнең йөрәгендә әле бу саф тойгының бөреләнеп чәчәк атар чагы гына. Унҗиде яшь... Гомернең иң матур, иң кадерле чагы икәнлеген без бик күп еллар үткәч кенә аңлыйбыз шул. Мәңгегә шулай яшь, матур, дәртле булырбыз кебек.
    3667
    0
    33
  • 24 март 2020 - 16:21
    ҮЗ ЯЛГЫШЫМ, ҮЗ ЯЗМЫШЫМ Рәмилә, уйларыннан арынып, наушнигын салды да кызының бүлмәсенә керде. Индира скайптан Марс белән аралаша иде. Шулай да әнисен күргәч, экранны сүндереп куйды. Рәмиләнең Хәбир турында бик сорыйсы килә иде. Әмма сүзне башка яктан башлады: “Син, кызым, дәү әниең белән алай дорфа сөйләшмә, ярыймы. Ул бит сиңа яхшылык кына тели”. Әнисенең бу сүзләре ачуын китердеме, Индира йөзен чытты: “Әни, син ул җен карчыгына буйсынып, үзеңне ирдән, мине әтидән яздырдың! Сез икегез дә аның корбаны!
    3547
    0
    36

Блоглар
  • МУСА ҖӘЛИЛ ИСЕМЕНДӘГЕ КӨРӘШ ЯРЫШЛАРЫ-2020 (ФОТОРЕПОРТАЖ)
  • CLUBTURBO WINTER DRIFT CUP ИКЕНЧЕ ЭТАП: ФОТОРЕПОРТАЖ
  • «ӘЙДӘ, ШАЯРТ»: ФИНАЛ
  • ТАТАР ИҖАДИ КОМАНДАЛАРЫ АРАСЫНДА МИНИ-ФУТБОЛ
  • РУБИН–ДИНАМО 0:1 (ФОТОРЕПОРТАЖ)
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019