ТУРНИКМЕНМЫ, ӘЛЛӘ ВОРКАУТЕРМЫ? /КАРТА/

Җәйге каникулларда энергияне кая курга белеп булмый. Ял итәм, диеп физкультураны онытып бетермә син тагын! Казандагы воркаут мәйданчыклары махсус синең өчен ясалган бит. Биредә син сәламәтлегеңне дә ныгыта аласың, дусларың белән дә ярыша аласың. Мондый мәйданчыклар Казан тулы! Аларны табып, Казан картасынна күрсәтеп тә бирәбез!

Модалы телдә сөйләшеп, воркаут, воркаут дигән булабыз… Нәрсә соң ул? Воркаут – ул һәвәскәр спорт төре. Инглиз теленнән «күнекмә», дип тәрҗемә ителә. Ул урамдагы спорт мәйданчыкларында шөгыльләнүне күз алдында тота.

турник

швед стенкасы

борыс

башка конструкцияләр

җир – болар барысы да воркаут төрләре.

Воркаутта көчне, чыдамлылыкны арттыру, үз үлчәмең белән эшләүгә төп игътибар бирелә. Мондый спорт белән кызыксынучыларны:

воркаутер

урам спортчысы

урам гимнасты

турникмен дип атыйлар.

2015 елдан башлап, Татарстанда парк һәм скверлар төзекләндерелгәч, аларның күбесендә воркаут мәйданчыклары барлыкка килде. Безнең карта буенча үзеңә якын воркаут мәйданчыкны таба аласың.

«Крылья Советов», Химиклар паркларында, Кремль яр буенда воркаут дәресләре уздырыла. Катнашу – бушлай. Су алырга гына онытма!:)