НӘСЕЛДӘН КИЛГӘН СӘЛӘТ
Салахова Камилә, 16 яшь, Казан, «П. В. Дементьев исемендәге Казан авиация-техник көллияте»ндә белем ала. Рәсем сәнгате белән шөгыльләнә.
– Камилә, сөйләп кит әле, ничек бу өлкәгә кереп киттең?
– Мин балачактан ук түгәрәкләргә йөрдем, ләкин беркайчан да балалар сәнгать мәктәбен тәмамлап, кызыл диплом алырмын дип уйламаган идем. Уку дәверендә төрле стильләрдә, жанрларда һәм юнәлешләрдә иҗат итәргә өйрәндем. Программада шулай ук декоратив-гамәли сәнгать дәресләре бар иде: анда төрле материалларга бизәкләр төшерә идек. Сәнгать тарихында безгә рәссамнар дөньяның төрле илләренең борынгы архитектурасы турында сөйләде.
– Кайсы жанрда ясыйсың?
– Барыннан да бигрәк миңа пейзаж һәм анималистика жанрлары ошый. Мисал өчен, анималистикада мин Интернетта тапкан фотосурәтләрдән карап ясыйм. Эскиз өчен түгәрәк, овал, өчпочмак кебек гади геометрик фигуралар кулланып, хайван фигурасын формалаштырам. Аннан бөгелешләргә һәм сызыкларга игътибар итеп, бераз детальләр өстим. Ахырда йон, тәңкә, мамык, күзләр, борын кебек элементларны эшкәртәм. Кайчак нәтиҗәне аклы-каралы калдырам, әмма күбрәк буяулар кулланам.
– Күргәзмәләргә еш йөрисеңме? Оештыручыларга, рәссамнарга карата тәнкыйть бармы?
– Сәнгать мәктәбенә йөргәндә, без еш кына күргәзмәләрдә була идек. Мондый чаралар мине илһамландыра: үземә яңа максатлар куеп, күренекле шәхесләр кебек зур нәтиҗәләргә ирешәсем килә башлый.
– Кул эшләренә дә оста үзең, кайчан өлгерәсең?
– Көллияттә уку аркасында буш вакыт аз, бу кәефемне бик төшерә. Шуңа да карамастан, мин бәйлим, чигәм, беләзекләр үрәм, брелоклар да ясыйм.
– Бу нәселдән килгән сәләтме, әллә рәсем ясый-ясый остардыңмы?
– Чыннан да, минем гаиләдә югары мәдәнияткә гашыйк кешеләр шактый. Әтием дә музыкаль коралларда әйбәт уйный, элегрәк хәтта шигырьләр дә язган. Дәү әтием яшь чагында шулай ук рәсемнәр ясаган. Болар барысы өлешчә миңа да күчкән һәм уңай тәэсир калдырган.
– Иҗади кеше буларак, техник юнәлешне сайлаганга үкенмисеңме?
– Бәлки, үкенәмдер. Әлбәттә, техник фәннәрне уку күпкә катлаулырак бирелә, ләкин мин зарланмыйм. Кыенлыклар алар бөтен җирдә дә бар. Киләчәктә тормыш мине яңадан иҗат белән бәйләр дип уйлыйм. Бу юнәлешне ташламаска һәм алга таба да шөгыльләнергә тырышачакмын!
Следите за самым важным и интересным в Telegram-каналеТатмедиа
Нет комментариев