ГҮЗӘЛ СӘГЫЙТОВА: «МАКСАТЫБЫЗ – ЭШ КҮРСӘТҮ ТҮГЕЛ, ФАЙДАСЫ БУЛСЫН ӨЧЕН ТЫРЫШАБЫЗ»

Казан шәһәренең Башкарма комитеты Туган телләр һәм Халыклар бердәмлеге елы уңаеннан Казанда узачак проектлар белән таныштырды.   

Бүген матбугат конференциясе кысаларында Казан шәһәренең Башкарма комитеты һәм Бөтендөнья татар яшьләре форумы вәкилләре журналистларны Туган телләр һәм Халыклар бердәмлеге елы уңаеннан Казанда узачак проектлар белән таныштырды.   

Хәзерге вакытта инде 3 проектка старт бирелгән. «Апрель – Тукай, татар шигърияте ае булганга күрә, татар теленә багышланган проектлар белән башлап җибәрдек. Алга таба башка телләргә дә багышланган файдалы проектлар булачак», – дип белдерде Казан шәһәре Башкарма комитеты җитәкчесе урынбасары Гүзәл Сәгыйтова.

Татар телен популярлаштыруга юнәлдерелгән бәйгеләрнең берсе – «Үз телем». Аның максаты – яшьләрне татар телен өйрәтү буенча проектлар уйлап табуга этәрү. Бәйгедә 35 яшькә кадәр булган яшьләр катнаша ала. Җиңүчеләргә исә проектларын тормышка ашыру өчен грант биреләчәк. Гомуми приз фонды 1 миллион сумны тәшкил итә. Проектның авторы һәм иганәчесе – депутат Рөстәм Рамазанов.

 Шулай ук «Саумы, Казан!» хикәяләр бәйгесе дә башланып китте. Бәйгегә татар һәм рус телләрендә язылган иҗат эшләре кабул ителә. Казан турындагы истәлекләргә, риваятьләргә таянып, яки шәһәребездә яшәгән шәхесләрнең тормышына, үз хатирәләреңә таянып, әсәр иҗат итәргә кирәк. Бәйге ике яшь категориясендә үткәрелә (18 – 35 яшь;   35 яшьтән өлкәнрәкләр). 1 урынга – 80, 2 урынга – 50, 3 урынга 30 мең сум күләмендә акчалата премия каралган. Иң яхшы хикәяләрне туплап, китап чыгару да күздә тотыла.

Шушы көннәрдә тагын бер файдалы проектка да старт бирелгән. 2021 елның 5 апреленнән алып, 7 маена кадәр Казан шәһәренең Башкарма комитеты Бөтендөнья татар яшьләре форумы белән берлектә хезмәт күрсәтү өлкәсендә эшләүчеләр өчен татар теле курслары уздыра. Әлеге вакыт аралыгында кунакханә, туклану урыны, сәүдә нокталары хезмәткәрләре бушлай татар теле кагыйдәләрен үзләштерә, грамматика һәм лексика буенча белемнәрен ныгыта. Дәресләрне Иннополис мәктәбендә татар телен укытучы Альберт Сәмигуллин алып бара. Әлеге курс онлайн режимда оештырыла. Курс 10 дәрестән тора. Ул тәмамлангач, интенсив укучылары тест тапшырачак. Аны уңышлы узучыларга квалификацияне үстерү таныклыгы һәм Казан шәһәре Башкарма комитетының сертификатлары биреләчәк. Шуны да искәртеп узарга кирәк: интенсив тәмамлангач, курс барышында яздырылган видеолар univer.tatar сайтында курс буларак чыгачак. Биредә аны теләгән һәр кеше үтәргә мөмкин.

«Әлбәттә, мондый проектлар бер ел гына дәвам итмәячәк. Максатыбыз – эш күрсәтү түгел, файдасы булсын өчен тырышабыз», – диде Гүзәл Сәгыйтова.

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
  • 22 май 2021 - 11:35
    ЗАМАНЧА СУ АНАСЫ ЯКИ КВАДРОКОПТЕР МАҖАРАСЫ Кәримне Өчиледә барсы да белә иде. Ул алай начар малай түгел. Кайчан карама – теге яки бу эш белән мәшгуль. Укудан кайткач, өйне җыештыра, савыт-сабаны юа. Соңыннан тышка чыгып, малларны карый. Тыштагы эшләрен бетереп керүгә, әнисе дә кайтып җитә.
    824
    0
    1
  • 26 май 2021 - 17:40
    САБАНТУЙГА КАРШЫ КИЧ Юлы уңарга тиеш бүген Нәргизәнең. Иртәдән болытлы торган күк йөзе, өйләдән соң кинәт ачылып китте дә, ялтырап кояш чыкты. Соңгы зачетын тапшырып, университет баскычларыннан йөгерә-йөгерә тукталышка ашыкты кыз. Хәзер тиз генә бүлмәсенә кереп, юл сумкасын алыр да, электричкага чыгар. Кыз җәлт кенә кул сәгатенә күз төшерде. Өлгерергә тиеш, электричка китәргә сәгатьтән артык вакыт бар әле.
    587
    0
    0
  • 31 май 2021 - 17:44
    ЗАМАНЧА КЫСТЫБЫЙ РЕЦЕПТЫ «Кыстыбый tatar-food» рестораннарының берсендә директор булып эшләүче Айнур Идиятулин белән «Чеп-чеби» кыстыбые әзерләдек. Аннан ашадык... Шундый тәмле булды! Серле рецептны сезнең өчен дип  язып та алдым. Уңайлырак булсын өчен фотога да төшердек. Рәхәтләнеп кулланыгыз!
    482
    0
    0

Блоглар