79 НЧЫ НОМЕРЛЫ ЛИЦЕЙДА «АҖАГАН 2.0» НИЧЕК УЗДЫ?

«Аҗаган 2.0» хәрби-патриотик уеннары үз эшен дәвам итә. «Алдынгылар хәрәкәте» ярдәмендә оештырылган проектта мәктәпләр бик актив катнашып килә.  Мәсәлән, 28 февраль көнне Казан шәһәренең «79 нчы номерлы экология-технология лицее» да әлеге уенны гөрләтеп үткәрде. Биредә «Ялкын» студиясе дә эшләде. Ничек узган, гомумән, балаларга ошаганмы икән, бу язмадан белерсез.

Әлеге лицей 2024 нче елның сентябрендә генә ачылган. Әмма моңа һәм «Аҗаган 2.0» кебек киң масштаблы чараның быел гына уздырылуына карамастан, балалар уеннарда бик теләп катнашты.

Риана Мукминова, 8А сыйныф укучысы:

«Бүген мәктәбебездә үткән «Аҗаган 2.0.» ярышында миңа иң ошаганы спорт уеннары иде. Шулай ук үзем әле эшли белмәсәм дә, егетләрнең автомат сүтеп җыюларына кызыгып карап тордым. Хәзер минем дә өйрәнәсе килә. Киләчәктә мондый чаралар тагын булыр дип ышанып калам».

Мәктәп буенча таратылган төрле нокталарда (станцияләрдә) укучылар үзләренең күнекмәләрен күрсәтте. Монда спорт уеннарында катнашу да, беренче ярдәм күрсәтү дә, автоматтан ату да бар иде. Балаларның бер-берсенә ярдәм итеп, кирәк чакта киңәшләр биреп һәм нәтиҗәләре белән бүлешәләрен күзәтү бигрәк тә кызык иде. Һәм бу, әлбәттә, сокландыра.

Галеева Гөлназ Ринатовна, лицей директоры:

«Аҗаган» – укучыларның әзерлеген төрле яктан тикшерә торган ярыш, һәм без аңа декабрьдән бирле әзерләндек. Мәсәлән, «Иминлек нигезләре һәм Туган илне саклау» дәресләрендә интерактив тирда ату күнекмәләрен яхшырту, Калашников автоматын сүтеп җыю, шәфкать туташы күзәтүе астында беренче ярдәм күрсәтү кебек чаралар башкарылды. Физкультура өлкәсендә ярышларыбыз күп булды, ә менә Ватанны саклауга кагылышлы чаралардан бу әле беренчесе. Һәм балаларны мондый төр ярышлар күбрәк кызыксындыра, дигән нәтиҗәгә килдек».

Башка мәктәпләрнең дә «Аҗаган 2.0» хәрби-патриотик уенында «79 нчы номерлы экология-технология лицее» кебек актив катнашуын көтеп калабыз!

Фотолар: Зилә Дәрҗеманова