ТАТАРСТАННЫҢ ИҢ ЭРУДИЦИЯЛЕ УКУЧЫЛАРЫ МАРИЙ ЭЛГА ЮЛ ТОТТЫ

12 мартта Йошкар-Олада мәктәп укучылары арасында уздырыла торган Идел буе федераль округ V Интеллектуаль олимпиадасының финал ачылышы булды.

Марий Эл башкаласына Идел буе регионнарыннан 168 иң акыллы, эрудицияле 8-11 сыйныф укучылары җыйналды. Берләшмә командаларына муниципаль һәм региональ сайлап алу ярышларының җиңүчеләре керәчәк.

Татарстан Республикасыннан Олимпиадага 12 укучыдан торган җыйма команда китте. Укучылар Казанның «Н.И. Лобачевский исемендәге лицей», «131нче номерлы лицей», Түбән Каманың «Бакый Урманче исемендәге 2нче номерлы гимназия» һәм «Иннополис лицее»ннан.