Татарстан – IV Интеллектуаль олимпиадада җиңүчеләр арасында

5 мартта Йошкар-Олада Идел буе федераль округындагы IV интеллектуаль олимпиаданың ябылу тантанасы узды. Аның нәтиҗәләре буенча Татарстан икенче урынны яулады.

Әлеге бәйгедә 168 өлкән сыйныф укучысы катнашты. Олимпиаданың төп максаты – укучыларны интеллектуаль яктан үстерү, аларны фәнни-инновацион эшчәнлеккә җәлеп итү. Алар робототехника, программалаштыру, уйлап табу мәсьәләләрен чишү, “Нәрсә? Кайда? Кайчан?” уеннарында ярышты. Бөтен бәйгеләр буенча гомумкоманда ярышларында беренче урынны Саратов командасы яулаган. Татарстан икенче урынны алган. Киров өлкәсе өченче урынга лаек булган. Җиңүчеләргә кубок һәм истәлекле бүләкләр тапшырылган.

2019 елда интеллектуаль олимпиадада 25,5 мең кеше катнашырга теләгән. Бу былтыргы саннар белән чагыштырганда, 8 меңгә артыграк.

Идел буе федераль округындагы интеллектуаль олимпиада «iВолга» яшьләр форумы катнашучылары инициативасы белән Идел буе федераль округында Россия Президентының вәкаләтле вәкиле Игорь Комаров ярдәме белән оештырыла.