МӘКТӘП УКУЧЫЛАРЫ ДӨРЕС ТУКЛАНУГА КҮЧӘ. НИЧЕК?

Россиядә 1нче декабрьдән “А дан Я га кадәр дөрес туклану” (“Здоровое питание от А до Я”) дигән проект старт ала. Ул 7-11 яшьлек мәктәп укучылары, аларның әти-әниләре һәм укытучылар өчен.

Әлеге проектның төп максаты – балаларны кече яшьтән үк дөрес тукланырга күнектерү. Статистикага күз салсак, дөньяда 340 млн бала артык авырлык (ожирениедән) интегә. Моның аркасында организмда тагын бик күп авырулар барлыкка килә ала.

Проектның координаторы Валентина Богомолова әйтүенчә курс 11 дәрестән тора.

– Безнең бурыч – балага дөрес туклануның мөһим булуын аңларга ярдәм итү, – ди ул.

Укучылар мәгълүматны яхшырак үзләштерсен өчен курс дәвамында компьютер, планшетлар да файдаланыла. Авторлар фикеренчә, алай эшләгәндә проект үтемлерәк булачак, чөнки балалар бүген заманча технологияләр белән аерылгысыз.

Проект инде Россиянең 28 өлкәсендә эшли, анда 25 мең укучы катнашкан. Мисал өчен, күптән түгел курсны 6 мең мәктәп укучысы сынаган. Аларның 75%ы яшелчә һәм җиләк-җимешне күбрәк ашый башлаган. Шулай ук өлкәннәр дә үз балаларының дөрес туклануга тартыла башлауларын сизгән.

Проектта һәр мәктәп һәм һәр укучы, укытучы һәм ата-ана катнаша ала. Моның өчен zdorovoe.menu сайтына кереп гариза тутырырга гына кирәк. Богомолова әйтүенчә, тиздән курс татар теленә дә тәрҗемә ителәчәк.