Казанда тагын ике граффити пәйда булачак 

Казанның Мәскәү районында яңа 2 граффити ясаячаклар. “Ак Барс” хоккей клубы Киров һәм Мәскәү районнары администрациясе белән берлектә граффити итеп ясалачак сурәткә конкурс игълан итә. 

- Яраткан Казаныбыз тагын да матуррак булырга тиеш. Бергәләп без әлеге эшне эшли алачакбыз. Барлык җанатарларыбызны да шәһәребезне матурлауга үз өлешләрен кертергә чакырабыз, - ди “Ак Барс” хоккей клубы үз хәбәрендә.

Иң яхшы эскиз авторына “Ак Барс”ның берәр уенчысының уен сеткасы (игровая сетка) тапшырылачак.

Исегезгә төшерәбез, күптән түгел Мәскәү районында яңа бер граффити барлыкка килгән иде инде. “Тасма” компаниясенең бер бинасында төшерелгән кызчыкка Мира дип исем куштылар. Сурәтнең озынлыгы - 30 метр. Граффитины «Sly Dog тәхәллүсе белән стрит-арт-художник ясаган. Шулай ук «Метроэлектротранс” бинасы диварында да бабай рәсеме ясадылар.