Чемпион Ильяс Хөснетдинов: «Гамәлең белән үрнәк күрсәтергә кирәк»

Ушу буенча күп тапкыр дөнья чемпионы булып танылган Ильяс Хөснетдинов бүген дә спортзалга барды! Әлбәттә, танылган спортчы һәр көн физик күнегүләр эшли, тик бүген көндезге якта спортзалга ул башка максаттан килгән иде.

Казанның 135 мәктәбе спортзалына урнашкан сайлау участогында чемпион егет илнең киләчәге өчен тавыш бирде.

«Һәр кеше сайлауга барып илебезнең киләчәге өчен тавыш бирергә тиеш, дип саныйм. Шушы гамәлең белән дусларыңа, якыннарыңа яхшы үрнәк күрсәтәсең. Сайлауларда катнашу мәҗбүри булмаса да, минем уйлавымча, бу – бик мөһим процедура, гражданлык җәмгыятенең мөһим күрсәткече булып тора», – дип "Ялкын" хәбәрчесенә фикерләре белән уртаклашты Ильяс Хөснетдинов.

Исегезгә төшерәбез: Республикада барлыгы 6 округ сайлау комиссиясе һәм 2817 участок сайлау комиссиясе. Үзәк сайлау комиссиясе мәгълүматлары буенча, бүгенге сайлауларда Татарстан Республикасыннан 2,933 млн сайлаучы катнашырга тиеш.