Аттестатлар үзгәрә: ни көтәргә?

Быелгы чыгарылыш укучыларының аттестатлары башкалардан аермалы булачак. Юк, алтын белән дә йөгертелмәгән алар, ука белән дә бизәлмәгән. Тик шулай булса да, “былтыргы А” түгел инде.

2019 елдагы 11нче сыйныф укучыларының мәктәпне тәмамлау турындагы документында ике төп яңалык булачак. Әлеге таныклыкта укучының нинди туган тел һәм нинди чит тел өйрәнгәнлеге язылачак. Ягъни аттестатта “Родной язык” һәм “Родная литература” предметларын төгәлләштерәчәкләр. 2018-2019 уку елында илебез мәктәпләрендә Россия халыкларының 81 теле өйрәтелгән.

Моннан тыш, быел урта гомуми белем алу турындагы кызыл тышлы аттестатны бөтен предметлардан да отличник булучылар ала алачак. Тик моның өчен математика һәм рус теленнән БДИ нәтиҗәләре 70 баллдан да ким булырга тиеш түгел.