АЙ-ҺАЙ, ДУЛЫЙ БУРАН...

Мәскәүдәге карлы начар һава торышы безгә дә килеп җитте. 5нче февральгә каршы төндә, башкалабыз Казанда явым-төшемнең айлык нормасы яуган.

Мэр Илсур Метшин хәбәр итүенчә, кар чистартучы техника төне буе эшләгән. Тик ишегалларында, кайбер юлларда проблемалар җитәрлек әле.

Шәһәрара автобуслар йөрми, аэропорт кайбер рейслардан баш тартырга мәҗбүр, боз кичү юллары ябык. Балалар бакчасы һәм мәктәпләр ирекле режимда эшли.

Буран әле көн дәвамында барачак дип фаразлана. Җиле бик көчле — 15-20 м/с, температура +1дән -4 градуска кадәр җитә. Сак булыгыз!