ТАТАРСТАН СТУДЕНТЛАРЫ WORLDSKILLS ФИНАЛЫНА САЙЛАП АЛУЛАРСЫЗ УЗГАН

Республикабыздагы төрле уку йортларында яшьләрне эшче профессияләренә төшендерәләр. Алай гына да түгел, студентлар бу юнәлештә төрле ярышларда да катнаша. Шуларның иң популяры, әлбәттә, WorldSkills ярышлары.

14 март - 7 апрель көннәрендә Россиянең сигез төбәгендә V «Яшь профессионаллар» WorldSkills Милли чемпионатының финалында катнашу өчен сайлап алу ярышлары үткәреләчәк.

Бу ярышлар 56 компетенция буенча узачак. Безнең республиканы 53 компетенция буенча ссузларда укучы 71 студент тәкъдим итәчәк. Аларның барысы да – WorldSkills республика чемпионаты җиңүчеләре. Шуларның 21е – 2019 елда Казанда узачак WorldSkills буенча дөнья чемпионатында Татарстан җыелмасы вәкиле.

Ә Татарстанның 16 студенты V «Яшь профессионаллар» WorldSkills Милли чемпионатының финалына сайлап алуларсыз узган. Алар 11 компетенциядә катнаша.

Республикабыз делегацияcе уңышлы чыгыш ясасын өчен, конкурсантларга махсус күнекмәләр уздырылган. Алар махсуслашкан компетенцияләр үзәгендә үткән.

Сайлап алу ярышлары Казанда да узачак. «IT» компетенциясе буенча ярышлар Татарстан башкаласында 22-29 мартта үткәреләчәк. Ярышлар Төбәкара компетенцияләр үзәге – Казан мәгълүмати технологияләр һәм элемтә техникумында оештырыла. Казанга ул көнне Россиянең 64 төбәгеннән 330 катнашучы җыелыр, дип көтелә. Студентлар үзләрен веб-дизайн, бизнес өчен программалар һәм башка өлкәдә сынаячак.