КАЗАННЫҢ 4 БАКЧАСЫНДА - ЗАМАНЧА СӘНГАТЬ

«Искра» урам сәнгате көннәрендә Казанның 4 паркында күргәзмәләр эшлиячәк. Лядской бакчасында плакат дизайны күргәзмәсе оештырылачак, Бакый Урманче скверында - «КОНТУРЫ. СМЕНА × RESEARCH_ARTS» проекты, «Эрмитаж» һәм Фукс бакчаларында рәссам Илгизәр Хәсәнов күргәзмәсе ачылыр дип көтелә.

---

Кайчан: 13-14 август
Кайда: Лядской, Фукс, «Эрмитаж», Горький бакчалары, Бакый Урманче скверы
Керү: ирекле

«КОНТУРЫ. СМЕНА × RESEARCH_ARTS»

Бу проект майда «Смена» заманча мәдәният үзәгенең Department of Research Arts белән берлектә үткән атналык резиденциясе кысаларында туган. Анда Мәскәү фотография мәктәбе яшь рәссамнары катнаша. Алар Казанның үткәнен өйрәнеп, шул үткәннең бүгенге көн Казанында чагылышын эзлиләр. Сәнгать аша, билгеле.

[caption id="attachment_9372" align="aligncenter" width="1180"] iskrafest фотолары.[/caption]

ПЛАКАТ ДИЗАЙНЫ КҮРГӘЗМӘСЕ

Бу күргәзмәдә Польша, Швейцария һәм Россия дизайнерлары катнаша. Эшләр өч зур төркемгә бүленә: Татарстан музейларына багышланган плакатлар, бездә булачак чараларга чакырулар һәм тарихи-мәдәни сюжетлар. Дизайн өлкәсендәге заманча тенденцияләр белән танышырга теләгән һәр кешене Лядской бакчасында көтеп калалар.

ИЛГИЗӘР ХӘСӘНОВ ИНСТАЛЯЦИЯЛӘРЕ

Казан рәссамы Илгизәр Хәсәнов бу көннәрдә ике паркны – Фукс һәм «Эрмитаж» бакчаларын алырга җыена. «Эрмитаж» бакчасында ул шагырь Велимир Хлебников иҗатына багышланган «Кош» проектын тәкъдим итәчәк. Фукс бакчасында исә Максим Горькийның яшьлек еллары – Казан чорына багышланган күргәзмә эшлиячәк.