ЯШҮСМЕРЛӘР «АСЫЛ» ТАТАР БАЛАЛАР ЛИДЕРЫ МӘКТӘБЕНДӘ ОЧРАШТЫ

26 октябрьдән 1 ноябрьгә кадәр Татарстанның Боровое Матюшино авылындагы «Волга» яшьләр үзәгендә «Асыл» татар балалар лидерлык мәктәбе узды. Быел ул Россиянең 19 төбәгеннән 12-17 яшьлек 80 катнашучыны берләштерде.

«Асыл» мәктәбе татар яшьләр оешмалары һәм берләшмәләрендә актив булган балаларны ачыклау һәм аларга ярдәм итүгә юнәлдерелгән. Программа яшүсмерләрнең лидерлык сыйфатларын, командада эшләү һәм проектлар булдыру күнекмәләрен үстерүне, шулай ук татар халкының тарихы һәм мәдәнияте белән якыннанрак таныштыруны максат итеп куя.

Мәктәпне Татарстан Республикасы Яшьләр эшләре министрлыгы, «Идел» яшьләр үзәге һәм Татарларның федераль милли-мәдәни автономиясе оештырды.

Быел «Асыл»да Татарстан, Мордовия һәм Удмуртия республикалары, Краснодар һәм Пермь крайлары, Әстерхан, Владимир, Иваново, Киров, Кострома, Түбән Новгород, Новосибирск, Оренбург, Пенза, Самара, Тула, Ульяновск, Чиләбе өлкәләре һәм Ханты-Манси автономияле округы Юградан килгән яшүсмерләр катнашты.

Команда төзүдән – лидерлыкка

26 октябрьдә катнашучылар «Идел» яшьләр үзәге проектлары белән танышты. Шулай ук КФУ вәкилләре белән очрашу узды: алар төрки халыклар һәм Татарстан тарихын өйрәнү белән бәйле уку юнәлешләре турында сөйләде. Аннары яшүсмерләр Илдар Гареевның команда туплауга багышланган тренингында катнашты һәм төркемнәрдә эшли башлады.

27 октябрьдә мәктәпнең тантаналы ачылышы узды. Анда Татарстан Республикасы яшьләр эшләре министры Азат Кадыйров, «Татар федераль милли-мәдәни автономиясе» Советы рәисе Илдар Гыйльметдинов, «Волга» яшьләр үзәге директоры Александр Карпов һәм «Идел» яшьләр үзәге директоры Салават Кадыйров катнашты.

Шул ук көнне яшүсмерләр «Габдерәхим Утыз Имәни исемендәге Әл Таң» мәчете имам-хатыйбы Ирек хәзрәт Җиһаншин белән очрашты. Әңгәмә әхлак һәм рухи кыйммәтләр темасына багышланды.

Дебатлар, чыгыш ясау һәм үз ресурсларыңны өйрәнү

28 октябрьдә Илдар Гареевның «Ресурсларны өйрәнү» тренингының теоретик һәм практик өлешләре узды. Катнашучылар дебатларда үзләрен сынап карады, ә алып баручы, режиссёр һәм чаралар оештыручы Сөләйман Сөләйманов алар өчен халык алдында чыгыш ясау буенча остаханә үткәрде.

Көн программасына спорт, команда белән эшләү һәм көнгә йомгак ясау да керде.

Казан белән танышу: театр, өчпочмак һәм музей

29 октябрьдә «Асыл» катнашучылары Казанга мәдәни сәфәргә чыкты. Алар Габдулла Кариев исемендәге Татар дәүләт яшь тамашачы театрында «Шайтан. Егет. Кыз» спектаклен карады.

Аннары яшүсмерләр «Туган авылым» милли-туристик комплексында булды һәм өчпочмак пешерү буенча остаханәдә катнашты. Сәфәр Татарстан Республикасы Милли музеена экскурсия белән дәвам итте.

Татар тарихы һәм эшмәкәрлек турында

30 октябрьдә катнашучылар Искәндәр Гыйльманов һәм Илнар Шәмсетдинов белән очрашты.

«Безгә нәрсә белән горурланырга?» очрашуында тарихчы, шәҗәрә белгече һәм Татарстан Республикасы Фәннәр академиясе аспиранты Искәндәр Гыйльманов татар халкының тарихы һәм мәдәнияте турында сөйләде.

Эшмәкәр, инвестор һәм Татарстан Республикасында «РосМолодёжь.Бизнес» рәисе Илнар Шәмсетдинов белән очрашуда исә бизнес, максат кую һәм эшмәкәрлек үзенчәлекләре турында фикер алыштылар.

«Киләчәк белән контракт» һәм мәктәпкә йомгак

31 октябрьдә Илдар Гареевның «Киләчәк белән контракт» тренингының теоретик һәм практик өлешләре узды. Аннары «ВОИН» яшьләрнең хәрби-спорт әзерлеген үстерү үзәге остаханә үткәрде. Катнашучылар автоматны сүтеп-җыю, дроннар белән идарә итү һәм беренче ярдәм күрсәтү нигезләре белән танышты.

Соңыннан «Асыл» татар балалар лидерлык мәктәбен тантаналы ябу чарасы узды. Смена нәтиҗәләренә йомгак ясалды, иң актив катнашучылар «ТБЛМ лидеры – 2026» һәм «ТБЛМны иң яхшы медиаяктырту – 2026» номинацияләрендә бүләкләнде.

Мәктәп иҗади концерт белән тәмамланды.

Фото: Алмаз Ногманов, «Идел» яшьләр үзәге