ЭЛЕККЕГЕ МӘКТӘП VS ХӘЗЕРГЕ МӘКТӘП

Заман үзгәрә, тормыш агымы тизәя, һәм, әлбәттә, бу үзгәрешләр мәктәпләргә дә кагыла. Элекке мәктәп белән бүгенге мәктәп арасында зур аерма бар: ул укыту методларында, укучыларның дөньясында, хәтта мәктәп формаларында да сизелә. Бу мәкаләдә без бу ике дөньяны чагыштырып, уртак якларын һәм аермалыкларын күрергә тырышырбыз.

Каләмнән планшетка

Элек язу өчен каләмнәрне үткенләп, кара савытлардан файдаланып, дәфтәрләргә язып утырганнар. Кагыйдәләрне ятлау, китаплардан күчереп утыру – менә шундый булган элекеге укыту методлары.

Хәзерге мәктәп исә – ул инновацияләр дөньясы. Интерактив такталар, компьютерлар, планшетлар, интернет ресурслары – болар барысы да укыту процессын тагын да кызыклырак һәм нәтиҗәлерәк итә. Укучылар хәзер мәгълүматны тиз таба, проектларны онлайн-платформаларда башкара, төрле кушымталар аша өйрәнә. Китаптан тыш, видеороликлар, презентацияләр, интерактив күнегүләр укуны яңа дәрәҗәгә күтәрә. Әмма шунысы да бар: кайбер укытучылар әле дә традицион методларны өстен күрә, чөнки аларның да үз файдасы бар.

Укучыларның дөньясы

Элекке мәктәп укучыларының дөньясы, гадәттә, уку һәм өй эшләреннән гыйбарәт булган. Укучылар арасында дуслык, уеннар һәм спорт төрләренә вакыт калмаган. Социаль челтәрләр, интернет һәм мобиль телефоннар юк, һәм укучыларның аралашу формасы да чикләнгән булган.

Хәзерге мәктәп укучыларының дөньясы күпкә бай. Социаль челтәрләр, онлайн уеннар һәм мобиль кушымталар укучылар арасында аралашуны җиңеләйтә. Спорт, сәнгать, фәннән тыш, укучыларның хоббилары һәм иҗади проектлары да актив үсә. Һәр укучының үзенең шәхси дөньясы, хыяллары һәм максатлары бар, бу исә аларның белем алу процессын кызыклы итә.

Түгәрәкләрдән гаджетларга

Элеккеге мәктәп ул – дуслар белән очрашу, бергәләп өй эшен башкару, аннан соң, бәлки, берәр түгәрәккә яки спорт секциясенә йөрүдер. Мәктәптән тыш вакытны файдалы итеп үткәрү төп максат булган. Урамда уеннар, бергәләп китап уку, әңгәмәләр – менә шундыйрак булган балачак.

Бүгенге укучыларның дөньясы тагын да киңрәк, әмма күбрәк виртуаль. Гаджетлар, социаль челтәрләр, онлайн-уеннар – болар барысы да аларның тормышының бер өлешенә әверелеп китте. Тик хәзерге укучылар да бик актив барыбер. Алар төрле проектларда катнаша, фәнни конференцияләргә йөри, халыкара бәйгеләрдә җиңүләр яулый. Мәктәптән тыш, аларның яраткан шөгыльләре дә күп – бию, музыка, робототехника, программалаштыру. Мәктәп диварларыннан тыш мөмкинлекләр ачыла балаларга.

Мәктәп формасы

Элекке мәктәптә формасы – ул бердәмлек, дисциплина символы булган. Барлык укучылар бер үк төстәге, бер үк фасондагы киемнәрдә йөргән. Кызлар өчен күлмәкләр һәм ал тасмалар, малайлар өчен костюмнар – бу социаль тигезлекне саклау өчен кирәк булган. Дресс-код — мәктәп дисциплинасын саклау өчен мөһим, ләкин ул укучыларның индивидуаллыгын чикли дип саныйм.

Хәзерге мәктәпләрдә форма төрле, кайбер мәктәпләрдә аны сайлау өчен ирек бирелә. Укучылар үз стильләрен, шәхесен күрсәтү мөмкинлегенә ия. Бу, үз чиратында, укучылар арасында дуслык, бердәмлек һәм иҗади фикерләүне үстерә.

Элекке мәктәп белән бүгенге мәктәп – ул бер юлның ике этабы. Элекке укыту методлары безгә тирән белем, ныклы хәтер бирсә, хәзерге заман методлары исә белемне тиз алырга, дөньяны киңрәк күрергә, иҗади фикерләргә өйрәтә. Укучыларның дөньясы да үзгә – гаджетлар тормышның бер өлешенә әверелсә дә, яшь буынның активлыгы, талантлары, омтылышлары һич тә кимеми. Мәктәп формасы да бердәмлектән индивидуальлеккә юнәлеш алды.

Һәр чорның үз мөмкинлекләре, үз үзенчәлекләре бар. Без моны онытмыйча, узганнардан сабак алып, киләчәккә омтылырга тиешбез. Чөнки мәктәп ул – белем бирү урыны гына түгел, киләчәкне тәрбияләү мохите дә.

Сурәт: ясалма фәһем