ТАТАРЧА БАРБИ БЕЛӘН КЕН: «ПЕЧӘН БАЗАРЫ» КЫСАЛАРЫНДА FASHION TATAR АКЦИЯСЕ УЗА

Казанда «Печән базары» фестивале кысаларында Fashion tatar акциясе узачак. Акция татарча милли һәм заманча костюмнарны популярлаштыруга юнәлдерелгән. Анда татар Кены һәм Барбиларын сайлаячаклар.

Акциягә кушылырга теләүчеләр 26 августта Кабан яр буендагы Мәрҗани һәйкәле янында «Печән базары» фестиваленең махсус фото зонасында Татар Барбие һәм татар Кены стилендә фотога төшәргә тиеш булачак. Образлар алсу төстә һәм заманча булу шарт. Фото ясаганнан соң, аны #fashiontatarmt хештегы белән социаль челтәрләрдә 26 август көнне 12.00-17.30 сәгатьләрендә урнаштырырга кирәк. Шул ук көнне 19.00 сәгатьтә акциягә йомгак ясалачак һәм иң яхшы образлар татар бизәнү әйберләре белән бүләкләнәчәк.