ТАТАР КИНОСЫНА – 100 ЯШЬ!

«Яланаяклы кыз», «Ак чәчәкләр», «Ядәч! Истә!»... Хәтерлисеңме, ТНВ каналыннан һәр кичне дәү әни һәм дәү әти белән Самат белән Дилбәр тарихын зарыгып көтә идек. Бу һәм калган фильм белән сериалларны төшерүче «Татаркино»га быел 100 яшь тулды!

Шул уңайдан Казанның Габдулла Тукай исемендәге Татар дәүләт филармониясе залында татар кинематографиясенең 100 еллык тарихын, республикабызда төшерелгән байтак кына фильмнарны искә алдылар. Чарага театр артистлары, режиссерлар һәм «Татаркино»да дистә еллар хезмәт куйган ветераннар чакырулы иде. Бәйрәм җыр, биюләр белән үрелеп барудан тыш, 100 ел эчендә күп кенә без, хәзерге яшьләр, күрмәгән һәм белмәгән татар киносыннан өзекләр күрсәтелде. Юбилей белән котларга дип, хәтта чит илләрдән дә «Татаркино»ның дуслары һәм хезмәттәшләре килгән иде.