СОРАШТЫРУ: ИҢ ХӨРМӘТКӘ ИЯ ҺӨНӘР

Россиядә сораштыру уздырганнар да, иң хөрмәтле һөнәр ияләрен ачыклаганнар.

Россия халкы җәмгыятьтәге иң хөрмәткә лаек һөнәр дип табибларны саный. Укытучылар икенче урында.

Сораштырылучыларның 59%ы табибларны бик нык хөрмәт итүләрен әйткән. 40%ы укытучыларны хөрмәт итүләрен белдергән. Шулай ук өч иң хөрмәткә лаек һөнәрләр арасында коткаручылар да бар. Аңа 38% кеше тавыш биргән.

Респондентлар табиблар, укытучылар, коткаручылар белән беррәттән янгын сүндерүчеләргә (27%) һәм галимнәргә (26%) булган хөрмәтләрен яшерми. Тагын 22% халык хәрби хезмәткәрләргә хөрмәтләре зур булуын әйтә.

19% россияле инженер, 14% очучы һәм машинистлар, 13% төзүче һәм 12% шахтачыларга хөрмәтләрен белдергән.