РОССИЯНЕҢ ИҢ ТАВЫШЛЫ ШӘҺӘРЛӘРЕ яки АРТЫК ШАУ-ШУ КУРКЫНЫЧЫ

Шәһәрләрдә төп тавыш чыганагы – транспорт. Сәнәгать предприятиеләре һәм төзелеш шулай ук үз тавышлары белән әйләнә-тирәне «пычрата». Роспотребнадзор исә Россиянең иң шау-шулы шәһәрләрен атаган, хәзер сезне дә алар белән таныштырабыз.

Санитар күзәтчелек идарәсе җитәкчесе урынбасары Андрей Гуськов сөйләгәнчә, Мәскәү, Санкт-Петербург, Екатеринбург, Севастополь, Липецк һәм Төмәндә хәл аеруча начар.

Шау-шуның артык күп күләмдә булуы сәламәтлеккә зыян китерергә мөмкин: кан басымы арта, сулыш кысыла... Әгәр шәһәр кешесе озак вакыт көчле тавышлар арасында яшәсә (мәсәлән, зур трасса янында яши икән), башка симптомнар да көчәя ала – баш авырту, ару, йөрәк һәм нерв системалары бозылу, ярсучанлык арту.

Сүз уңаеннан, иң тыныч төбәкләр исемлегенә Камчатка, Карачай-Черкесия һәм Калмыкия кертелгән.