РОСПОТРЕБНАДЗОР: ТАТАРСТАН МӘКТӘПЛӘРЕ ЯҢА УКУ ЕЛЫНА ӘЗЕР ТҮГЕЛ

Роспотребнадзорның Татарстан буенча региональ идарә җитәкчесе Марина Патяшина республика мәктәпләренең яңа уку елына әзерлеге начар булуын билгеләп үтте. 211 мәктәп тикшерелгән, бу республикадагы барлык мәктәпләрнең 12%ы.

Марина Патяшина сүзләренчә, тикшерелгән мәктәпләрнең 63%ы яңа уку елына әзер түгел. Әзерсезлекнең иң төп сәбәбе – бактерицид нурланыш чаралары җитәрлек булмау. 

Яңа уку елында мәктәпләр, коронавирус инфекциясе таралу барлыкка килмәсен өчен, яңа санитар нормаларны үтәргә тиеш булачак.

Быел Татарстанда 53 мең бала беренче сыйныфка барачагы билгеле.