КАЗАНДА «МИЛЛИ КИЕМ» ФЕСТИВАЛЕ УЗАЧАК

Кабан күле буенда 30 августта «Милли кием» чарасы узачак, анда теләгән һәркем үз халкының милли костюмында килә ала. Аны үткәрү вакытында, 12:00 сәгатьтән 21:00 сәгатькә кадәр, Мәрҗани урамы җәяүлеләр өчен генә ачык булачак.

Программага дизайнерлар һәм брендлар маркеты, милли аксессуарлар булдыру буенча остаханәләр, милли киемнәрне киеп мода күрсәтү кергән. Шулай ук ТР Филармония джаз оркестры чыгышы, костюмнар һәм аксессуарларга багышланган экскурсияләр дә булачак. Чара режиссер Айдар Җәббаровның «Тукай Казанга кайтты...» авторлык спектакле белән тәмамланачак.

Шулай ук бу көнне танылган татар эшлеклеләре образларына багышланган «Кием галәме» күргәзмәсе дә ачылырга тиеш. Аны Камал театрыннан төшү юлында күрергә мөмкин булачак.