КАЗАНДА АНИМЕ-ФЕСТИВАЛЬ УЗАЧАК?

Казанда аниме-фестиваль оештырырга мөмкиннәр. Бу хакта «Алдынгылар хәрәкәте» Республика бүлеге җитәкчесе Тимур Сөләйманов әйтеп узды.

Сөләйманов сүзләренчә, япон мультипликациясенең шәхес формалашуга йогынтысын исәпкә алырга кирәк. Өстәвенә, аның әхлак нормалары һәм башка кыйммәтләр белән нинди бәйләнештә булуы да бәяләнергә тиеш. Сөләйманов Казанда аниме-фестиваль уздыру мәсьәләсе буенча тавыш бирүне башлап җибәргән. Әлегә 800 дән артык кеше тавыш биргән, 46 % кеше моны хуплаган. Аның фикеренчә, хәзерге яшьләрнең аниме белән кызыксынуы бу инициативаны чыннан да игътибарга лаек итә.