КАР КАЙЧАН ТУКТЫЙ?

Күп итеп кар яву сәбәпләре, карның кайчан туктавы турында сорауларга Казан федераль университеты профессоры Юрий Переведенцев җавап бирә.

– Безнең метостанция фаразлавынча, гыйнварда 41 мм явымз-төшем көтелә иде. Ай башыннан кичәге көнгә кадәр 26 мм явым-төшем җыелды инде. Кичә 16 мм кар яуды. Бу – айлык норманың өчтән береннән дә күбрәк. Шул рәвешле, Казандагы айлык норма үтәлде. Хәзер инде артыгы белән ява башлады. Әмма бу начар түгел, чөнки авыл хуҗалыгы өчен явым-төшемнәр бик мөһим, - ди Юрий Переведенцев.

Профессор әйтүенчә, декабрьдә норманың яртысы гына яуган:

– Гыйнвардагы явым-төшем күләменең нормадан артып китү ихтималы бик зур, - ди белгеч, - чөнки 15-16 гыйнвар кичләрендә тагын 7-8 мм кар явуы көтелә. Аннан соң өч көн дәвамында кар яву ихтималы аз булачак.