ГОРЬКИЙ ПАРКЫНДА КУБЫЗДА ҺӘМ КУРАЙДА УЙНАУ, КИЕЗ БАСУ ҺӘМ БАШКОРТ БИЮЕ БУЕНЧА ОСТАХАНӘЛӘР ҮТӘЧӘК

5 июльдә Казанның Горький паркында башкорт мәдәниятенә багышланган «Тормыш агачы» проектының беренче чарасы узачак дип хәбәр ителә Казан мэриясе сайтында.

Теләге булганнар традицион костюмнар, бизәнү әйберләре, декоратив-кулланма сәнгать, традицион уеннар, мәкальләр, башкортларның музыка кораллары белән таныша алачак, шулай ук традицион башкорт уен коралы кубыз һәм курайда уйнарга өйрәнү мөмкинлеге булачак. Башкорт күкрәк бизәкләре, агач савыт-сабага рәсем төшерү, башкорт орнаменты белән брошюра ясау, киез басу һәм чигү буенча остаханәләр оештырылачак. Бәйрәмнең нәни катнашучылары өчен дә программа әзерләнгән: бу квест та, әкиятләр дә, уеннар да. Ә төп мәйданчыкта башкорт биюе буенча остаханә узачак, аны Уфадан «Самауырлы ногайым» проектында катнашучылар үткәрәчәк. Чарада Башкортстан Республикасыннан популяр курайчы, халыкара һәм бөтенроссия конкурслары лауреаты Юлай Касыймов чыгыш ясаячак.