«ГЛАГОЛИЦА» ПРЕМИЯСЕНЕҢ БҮЛӘКЛӘҮ ТАНТАНАСЫНДА АКТРИСА НОННА ГРИШАЕВА КАТНАШАЧАК

20 ноябрьдә С. Сәйдәшев исемендәге Концертлар залында X Халыкара «Глаголица» әдәби премиясе җиңүчеләрен бүләкләү тантанасы узачак. «Бәллүр ябалак» статуэткасын 2560 гариза арасыннан сайлап алынган 6 яшь язучы алачак. Тантанада театр һәм кино актрисасы, алып баручы Нонна Гришаева катнашачак.

Быел премиянең бүләкләү тантанасы ачык рәвештә үтә. Димәк, анда теләгән һәркем килә ала дигән сүз. «Глаголица» әдәби премиясенә рус һәм татар телләрендә проза һәм шигърияттә ике яшь категориясендә катнашырга була. Быел гаризалар кампаниясе шаккаттыргыч үткән. Казахстан, Үзбәкстан, хәтта Бөекбритания, Израиль, Сирия илләреннән дә катнашырга теләүчеләр булмаган түгел.