ДӘРЕС ОЗЫНЛЫГЫ КҮПМЕ БУЛЫРГА ТИЕШ?

Беренче сыйныф укучылары өчен дәресләр сентябрьдән декабрьгә кадәр 35 минуттан, ә гыйнвардан майга кадәр 40 минуттан артмаска тиеш. Бу хакта Россия Мәгариф министрлыгының методик киңәшләрендә әйтелә, дип хәбәр итә ТАСС.

Документта күрсәтелгәнчә, уку елы дәвамында дәресләрнең максималь озынлыгы түбәндәгечә билгеләнә:

— 1 нче сыйныфта — сентябрьдән декабрьгә кадәр 35 минут, гыйнвардан майга кадәр 40 минут;

— 2–11 нче сыйныфларда — 45 минут;

— сәламәтлек мөмкинлекләре чикләнгән балалар белем ала торган сыйныфларда — 40 минут.

Беренче сыйныф укучыларының мәктәпкә ияләшүен җиңеләйтү өчен сентябрь һәм октябрь айларында кайбер фәннәрне өйрәнүгә тәкъдим ителгән сәгатьләр санын киметергә дә рөхсәт ителә.

Моннан тыш, 2026 елның 1 сентябреннән беренче сыйныф укучыларына өй эшләре бирелмәячәк.