МИН УРАЗА ТОТАМ

Ураза – мөселманар өчен фарыз гамәлләрнең берсе. Гарәп теленнән тәрҗемә иткәндә, тыелу дигәнне аңлата. Коръәндәге Әл-Бәкара сүрәсенең 183нче аятендә мондый юллар бар: «Әй, иман китергән кешеләр, сездән алдагы кавемнәргә фарыз булган кебек, сезгә дә ураза фарыз булды, уразаларыгызны тотыгыз, шаять тәкъвалардан булырсыз».

Мөселманнар рамазан аенда ихлас күңелдән, Аллаһы Тәгаләнең әҗер-савапларын өмет итеп, ураза тоталар. Таң атканнан алып кояш батканчыга кадәр ризыктан тыелып тору өчен күп сабырлык кирәк, әлбәттә. Ураза тоту ашау-эчү белән генә бәйле түгел. Начар уйлардан, кирәксез сүзләрдән, башкалар турында гайбәт сөйләүдән телебезне, күңелебезне тыю да кирәк. Ислам динендәге кешеләр өчен изге булган әлеге айда без сыналабыз. Нәфесебез белән көрәштә үзебезнең аны җиңә алуыбызны, Аллаһы Тәгаләгә якынлыгыбызны исбатлыйбыз.

Рамазан аен мөселманнар көтеп алалар. Бу ай кешеләрне бер-берсенә тагын да якынайта, туганлык хисләре арта, без мохтаҗ, ач кешеләрнең хәлләрен аңлый башлыйбыз. Сәламәтлеге булган һәркем ураза тота, күпләр туганнарын, якыннарын җыеп ифтар мәҗлесләре үткәрергә тырышалар.

Минем туган авылымда да ифтар мәҗлесләре һәр йортта диярлек үткәрелә. Гаиләбез дә һәр елны ураза тотарга, авыз ачтырырга тырыша. Кечкенә вакыттан ук намаз укуларын, ураза тотуларын күреп үскәнгәме, минем өчен болар – гадәти тормыш рәвеше.

Шунысы куанычлы: олы әби-бабайлар, әти-әниләр генә түгел, бүген минем яшьтәшләрем дә ислам диненең кагыйдәләрен үтиләр. Дусларым арасында намаз укучы, ураза тотучылар да шактый. Дус кызларым әлеге изге ай турында күп беләләр, күбесенең гаиләсендә барысы да ураза тота икән. Дусларымның фикерләре мине куандыра һәм илһамландыра:

«Эссе җәй көнедә ураза тотувы авыр булды, ләкин авыз ачуга бар арыганлык онытыла. Күңелдә бер тынычлык, рәхәтлек кала».

«Бары тик ураза тотканнан соң гына ризыкның кадерен аңлыйсың. Кемнәрнеңдер ашарларына да булмавын уйлыйсың, аларның хәленә керәсең».

«Әлеге айда эшләгән бер изгелеккә 70 савап языла».

«Таң беленгәнче үк торасы булса да, гаиләбез белән сәхәр ашаулар рәхәт».

«Ифтар мәҗлесендә катнашу өчен, туганнарыбыз да килә. Алар белән очрашу-күрешү күңелле дә, саваплы да».

«Ураза тоту ихтыяр көче, сабырлык кебек сыйфатларны да арттыра».

Сыйныфташым Диләрә дә рамазан аен көтеп ала. Аларның зур һәм тату гаиләсендә барысы 7 кеше ураза тота. Ул миңа белгәннәре, үзләренең изге айны ничек итеп үткәрүләре турында сөйләде:

– Рамазан аенда кешеләр үзләренең гөнаһларыннан арыналар. Аллаһы Тәгалә аларга яхшы эшләрне күбрәк эшләргә мөмкинчелек бирә, чөнки савапларның саны берничә тапкырга арта. Бу айда кылган начар эшләрнең гөнаһы, җәзасы да күбәя бара.

Без гаиләдә 10 бала. Әти-әниләр белән бергә без дә ураза тотабыз. Кечерәкләр үзләренең мөмкинлекләренә карап, аерым көннәрдә генә безгә кушылалар. Көндез мин әнием белән бергә ифтар өчен ризык әзерлим. Ә инде вакыты җиткәч, хөрмә, йөзем җимешләре белән авыз ачабыз, бергә татлы ризыклар белән сыйланабыз. Әгәр дә гаилә әгъзаларының һәрберсе изге бурычны бергә үтәсә, бу бик әйбәт, чөнки кешеләрнең мөнәсәбәте яхшыра, алар бердәм, бер тату гаиләгә әйләнәләр. Ерак туганнарыбыз турында да онытмыйбыз. Без бер-беребезгә кунакка йөрешәбез, ифтар үткәрәбез. Ризыкларны исраф итмибез, мохтаҗ күршеләребезгә бирәбез. Изге айда вакытны бушка сарыф итмәскә тырышам. Рамазан аенда мин чын күңелемнән намаз укыйм, Коръән аятьләрен үзләштерергә тырышам, ислам дине турында өйрәнәм. Минем кечкенә энекәшләрем дә рамазан аен яраталар, бәләкәй булуларына карамастан, безнең кебек ураза тотарга, намаз укырга телиләр.
Рамазан ае килеп тә җитте. Ураза тотуның фарыз гамәл булуын барыбыз да аңлыйбыз. Аллаһы Тәгалә исеменнән Пәйгамбәребез Мөхәммәд (с.г.в.)гә болай дип әйтелгән: «Адәм баласының һәр кылган гамәле үзе өчен булса, тоткан уразасы – Минем өчен һәм әҗерен дә Үзем хисапсыз бирермен».

Изге рамазан аенда ураза тотучыларга җиңеллек, сабырлык телибез. Уразаларыбыз кабул булып, әҗер-савапларга ирешергә насыйп булса иде.

Әлфинур Әхмәтшина

Нравится
Комментарии (0)
Осталось символов:
Шәп укыла
  • 21 сентябрь 2019 - 20:55
    НИГЕЗ ЙОРТ Сания карчыкның бәгыренә төшкән сагыш иксез-чиксез иде. Бу сагышны бер генә үлчәмгә салып та, бер генә бизмәнгә куеп та булмыйдыр. Ул аны гүя утырган эскәмиясенә мәңгелеккә беркетеп куйган да үзе башка җаннар эзләп китеп барган. Шуңа күрәдерме, Саниянең күңеленә авыр булса да, аның җаны тыныч иде...
    2508
    1
    51
  • 22 сентябрь 2019 - 14:14
    ВӘСИЛӘ Күпләр өчен мәктәпнең ямен алып китте Вәсилә апалары. Шул китүеннән башка килә алмады Вәсилә яраткан мәктәбенә. Авыр чир утыз ике яшьлек чибәр хатынны, аяктан яздырып, урынга беркетте. Көннән көнгә сүнә барды Вәсилә, корый барды. Хастаханәдә дә аңардан тиз баш тарттылар. Үзенә берни әйтмәсәләр дә, табиблар Вәсиләнең ире Ниязны ачыктан-ачык кисәттеләр: “Без ярдәм итәрлек түгел...” Бианасы Кәримә карчык киленен им-томлап та карады. Тик Вәсиләне аягыннан еккан авыр чир китәргә килмәгән иде шул. Айлар буе ятты да ятты урында Вәсилә. Берни аңламаган биш яшьлек кызы Ләйлә белән аңардан да кечерәк улы Фәрит кенә: “Әни, тор инде. Кайчан мәктәпкә барасың?”, - дип җанын кыйдылар.
    1949
    1
    24
  • 26 сентябрь 2019 - 15:08
    ПЕРӘ Вәсил бүген дә иртә таңнан, әнисе урыныннан кузгалып кыштыр-мыштыр йөри башлауга ук, йокысыннан торып утырды. Әнә ул инде кичтән үк әзерләп куелган утыннарны мичкә тутырып, ут үрләтеп җибәргән, сыерны савып кереп, сөтен дә сөзеп куйган. Менә хәзер самавырга чиләктән су салыр, торбасына яңа өлгергән кузлы күмерләрне өстәп җибәрер. Мичтә дөрләгән ялкынга, самавыр торбасы «тәрәзәчек»ләреннән күз кыскан кузларга карап утырырга ярата ул. Улының иртәләрен әнә шулай онытылып, утларны күзәтеп утыруын әнисе сизми диярлек. Сизеп тә игътибар итмиме? Комачауламагач, ярый, утырсын инде, ихтыяры, дияме?
    1773
    0
    13
  • 12 октябрь 2019 - 11:30
    БУШ ЙОРТ Туганыннан артык күреп яраткан күршесе Зөһрә карчык үлеп, өч-дүрт ел үтүгә, аның өен авылның теге башында яшәгән ике балалы, яше утыздан арткан Зөлфәт сатып алгач, ялгызы яшәп яткан Гөлсемнең тынычлыгы югалды. Зөлфәтнең авыл халкына ясаган этлекләрен күреп-ишетеп белгән хатын, яңа күршеләре белән бик якыннан аралашмаса да, йорт-бакчалары терәлеп торгач, алардан качып та яши алмады.
    1654
    0
    14
  • 10 октябрь 2019 - 16:48
    ТУКТАЛЫШ “Тизрәк! Тизрәк!..” Кыска гына мизгелгә аңына килгән Айдар үз янында кайнашкан ак халатлы кешеләрнең кем икәнлеген дә, кая ашыкканнарын да аңламыйча, бөтен тәненә таралган кискен авыртудан тагын аңын җуйды... Тукталышта юл аша чыгарга басып торганда килеп бәрелгән машинаны ул хәтерләмәде. Изелгән аякларын бот төбеннән кисәчәкләрен белми иде әле утыз тугыз яшьлек авыл укытучысы...
    1644
    2
    24

  • 23 сентябрь 2019 - 15:32
    ЖВАЧКА: "БҮГЕН МИНЕМ ТУГАН КӨН!" Бүген без көненә берәр пачка чәйни торган ЖВАЧКАның туган көне. Аңа ничә яшь дип уйлыйсыз? Ничек уйлап тапканнар? Хәзер беләбез!
    136
    0
    0
  • 27 август 2019 - 11:02
    РОССИЯДӘ ШӘП ФИЛЬМ ТӨШЕРӘ БЕЛӘЛӘР! 27нче август – Россия кинематографиясе көне. Россиядә, Совет чорында төшерелгән фильмнарга карата шикләнеп караучылар шактый, әмма син андыйлардан булсаң, бу язманы ябып куярга ашыкма, чөнки Россия кинематографиясе “Ёлки”, “Притяжение”, “Бабушка лёгкого поведения” ише чүп-чардан гына тормый. Һәм без сиңа блогер Badcomedian фикеренчә иң яхшы 5 рус телле фильм тәкъдим итәбез!
    205
    0
    2
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019