Казан үзәгендәге бер бина “Россиянең иң ямьсез 10 бинасы” исемлегенә эләккән

«Кольцо» сәүдә үзәге Россиянең иң ямьсез 10 бинасы исемлегенә эләккән. Әлеге антирейтингны “Russia beyond the Headlines” дип исемләнгән инглиз телендә чыга торган басма әзерләгән. 

Экспертлар билгеләвенчә, сәүдә үзәгенең тышкы ягы ямьсез генә түгел, мәгънәсез дә. Чал тарихлы Казан өчен ул бигрәк тә ятышсыз. “Кольцо” исемлектә җиденче урынны “яулаган”.



Мондый биналар арасында Мәскәүдәге “Grand Furniture” сәүдә үзәге, “Et Cetera” театры, Сочидагы “Marriott” кунакханәсе, “Nautilus” сәүдә үзәге, Тверьдәге “Ryumka” бизнес-үзәге, Костромадагы “Fura” сәүдә үзәге һәм «Санкт-Петербург Плаза» бизнес-үзәге дә бар. Иң соңгылар булып Сарансктагы Россия Почтасы бинасы һәм Владивостоктагы “Clover House” тора.