ЯҢА РИЗЫК ПЕШЕРЕРГӘ ӨЙРӘНӘБЕЗ

Нинди генә бәйрәмнәр юк җир йөзендә. Мәсәлән, 4 февральдә өйдә якыннар белән аш ашау көне билгеләп үтелә икән.

Шул уңайдан без ясмык (чечевица) ашы рецепты белән танышып узарбыз. Гади, әмма шул ук вакытта бик файдалы булган ризыкны сез дә авыз итеп карагыз әле!

Безгә кирәк булачак: бер суган, ике уртача кишер, бер стакан ясмык, ике төш сарымсак, томат пастасы, сыек май, тоз һәм тәмләткечләр.

Суганны вак итеп турыйбыз, кишерне угычтан уабыз һәм йомшарганчы кыздырабыз. Шуннан соң бер зур кашык томат пастасы салып, берничә минут утта тотабыз. Яшелчәләр өстенә юылган ясмыкны һәм су салабыз. 5 минут пешкәннән соң, сарымсакларны өстибез. Тоз һәм тәмләткечләр турында да онытмыйбыз. Пешеп чыкканнан соң, блендер белән ваклыйбыз. Әзер! Аксымга бай булган файдалы ризыкны табынга чыгарасы гына калды. Ашларыгыз тәмле булсын!

Фотосурәт: «freepic.com»