2025 ЕЛ ЯЗГЫ КИЕМ ТРЕНДЛАРЫ

2025 елның язы модага яңа сулыш өрәчәк! Мода тенденцияләре уңайлылыкка, шәхси стильгә һәм әйләнә-тирәгә сакчыл карашка нигезләнәчәк. Әйдәгез, төп трендларны барлыйк.

1. Төсләр һәм принтлар:

– табигать палитрасы: ком, каһвә, зәйтүн төсләре актуаль булачак. Алар табигать белән бердәмлек хисен тудыра һәм башка төсләр белән дә бик яхшы килешә.

– пастель төсләр: алсу, зәңгәр, лаванда, бөтнек төсләре романтик образлар өчен идеаль.

– ачык  акцентлар: фуксия, кызгылт-сары төсләр образга энергия өстәячәк. Аларны аксессуарларда яки аерым элементларда кулланырга мөмкин.

– чәчәкләр: язгы киемнәрдә чәчәк мотивлары һәрвакыт актуаль. 2025 елда эре чәчәкләр, акварель рәсемнәр һәм вак чәчәкле принтлар популяр булачак.

– геометрия: геометрик фигуралар, сызыклар минималистик стильдәге киемнәрдә яхшы күренәчәк.

2. Тукымалардан органик мамык һәм җитен популяр булачак, бигрәк тә җәйге эссе көннәрдә.

3. Төп киемнәрдән трикотаж костюм, миди-күлмәк, киң чалбар һәм пиджаклар актуаль булачак.

4. Аксессуарлардан исә зур сумкалар, нечкә алтын яки көмеш бизәнү әйберләре, ефәк шарфлар, киң каешлар образларны үтә дә отышлы итәчәк.

Мода һәрвакыт үзгәрә, шуңа иң мөһимен онытмагыз: үзеңне уңайлы хис итү.

Фото: Freepik.com