ТАТАРСТАНЛЫЛАР УЗГАН ЕЛДА МОШЕННИКЛАРГА 5,6 МИЛЛИАРД СУМ АКЧА ҖИБӘРГӘН

Узган ел дәвамында Татарстан халкы мошенниклар кулына 5 миллиард 644 миллион сум акча биргән. Бу хакта Татарстан Республикасы Эчке эшләр министрлыгы хәбәр итүен «Татар-информ» мәгълүмат агентлыгы яза.

Аның сүзләренчә, бер ел элек, 2024 елда, әлеге күрсәткеч бераз югарырак булган һәм 5 миллиард 659 миллион сум тәшкил иткән. Шулай итеп, мошенниклар китергән зыян 15 миллион сумга кимегән.

Моннан тыш, 2025 елда аферистлар республикада яшәүче 131 балигъ булмаган үсмерне алдап, акчаларын үзләштергән.

Хокук саклау органнары халыкны уяу булырга, шикле шалтыратуларга һәм хәбәрләргә ышанмаска чакыра.