"Салават Күпере" комплексына апрельдә күченә башлаячаклар

12 апрельдә Казанның Осиново бистәсендәге "Салават Күпере" торак комплексының беренче йортына күченә башлаячаклар. Бу хакта "Татар-информ"да узган матбугат конференциясендә Татарстанның Төзелеш, архитектура һәм торак-коммуналь хуҗалыгы министры урынбасары Илшат Гыймаев җиткерде.

"Безнең беренче карлыгач – төзелеше төгәлләнгән 13-1 нче йорт ул. 7 апрельдә таләпләргә җавап бирү турында йомгаклау нәтиҗәсе алынды. 12 апрельдә файдалануга тапшырылу турында акт алу көтелә. Бу көнне үк социаль ипотека хуҗалары, фатир ачкычларын алып, күченә башлаячак», – дип белдерде Гыймаев.

Комплексның тагын ике йорты - 10-2 һәм 10-7 номерлы биналар май ахырына кадәр тапшырылачак. Илшат Гыймаев сүзләренчә, комплексның күпчелек йортлары августта әзер булыр дип көтелә. Татарстан Президенты боерыгы нигезендә 15 сентябрьгә барлык йортлар да әзер булыр дип көтелә.

//Татар-информ//