ГАДЖЕТ

ПЕСИ УРЛАДЫ

Мин үз гомеремдә күргән копилкаларның иң кызыклысы – Mechanical Kitty Coin Bank. 11.5 х 12 х 10 см зурлыктагы гади катыргы тартманы хәтерләтә. Аның кырыенда вак акча куяр өчен махсус урын бар. Акчаны куйгач, тартма әкрен генә ачыла да, аннан песи күренә. Ул тиз генә тиенне эләктереп ала һәм мырылдап («рәхмәт әйтеп») тартмага кереп югала. Хәзер инде бик теләсәң дә тартманы ача алмыйсың, песи дә юк, акча да. Бу гаджетны кәефеңне күтәрү өчен кулланырга да була. Тиенлек акчаларны диаметры буенча туры килә торган авыр (металлдан ясалган) төймәләргә алыштыра аласың. Песинең төймәләрне урлавын карап тору, чыннан да кызык. Гаджет 30$ тора.