СӘХӘРДӘ НӘРСӘ АШАРГА?

Сәхәр – көн буена көч бирә торган иң мөһим аш. Ул туклыклы, ләкин артык авыр булмаган, озакка җитәрлек энергия бирә торган булырга тиеш. Әлеге язмада исә җиңел әзерләнә торган ризыклар рецепты белән танышырбыз.

Йомырка һәм яшелчәле тәбә

Сәхәрдә аксымга бай ризык аеруча мөһим. Йомырка озакка туклык хисе бирә, ә яшелчәләр организмны витаминнар белән баета.

Ингредиентлар:

– 3 йомырка;

– 1 помидор;

– 1 болгар борычы;

– бер уч шпинат яки яшел суган;

– тоз, кара борыч;

– 1 аш кашыгы зәйтүн мае.

Әзерләү тәртибе: Йомыркаларны тоз һәм борыч белән болгатабыз. Табага вак итеп туралган яшелчәләрне салып, җиңелчә генә кыздырабыз. Өстенә йомырка массасын агызабыз һәм капкач астында 5-7 минут пешерәбез.

Сөтле солы боткасы

Солы ярмасы – әкрен үзләштерелә торган углеводлар чыганагы. Ул көн дәвамында энергия сакларга ярдәм итә.

Ингредиентлар:

– 1 стакан солы ярмасы;

– 2 стакан сөт (яки су);

– бер уч чикләвек;

– күрәгә, йөзем;

– 1 чәй кашыгы бал.

Әзерләү тәртибе: Сөтне кайнатып чыгарабыз, ярманы өстибез һәм 7-10 минут пешерәбез. Әзер боткага кипкән җимешләр, чикләвек һәм бал кушабыз.

Файдалы киңәш: Шикәр урынына бал яки финик куллану организм өчен җиңелрәк.

Җиләк-җимеш һәм йогурттан салат

Кемдер иртән авыр ризык яратмый. Мондый очракта йогурт һәм җиләк-җимеш – иң яхшы вариант.

Ингредиентлар:

– 1 стакан йогурт;

– алма, банан, җиләк;

– бер уч чикләвек.

Барлык ингредиентларны турап, йогурт белән туглыйбыз. Теләк буенча бераз бал өстәргә мөмкин.

Сәхәр өчен гомуми киңәшләр:

– Күп итеп су эчәргә онытмагыз.

– Тозлы һәм артык баллы ризыклардан сакланыгыз.

– Кофе һәм куе чәй сусауны арттырырга мөмкин.

Аксым + әкрен углеводлар + файдалы майлар – сәхәрнең алтын формуласы.

Рамазан ае мөбарәк булсын! Сәхәрләрегез бәрәкәтле, күңелләрегез тыныч булсын.