ИҖАДИ ФЕСТИВАЛЬГӘ БАРАБЫЗМЫ?

Әлмәтлеләр өчен шәп яңалык! 2 август көнне биредәге Индустриаль скверда «Свобода» дип аталган фестиваль булып узачак. Ул – спортны, биюне, җырны һәм урам сәнгатен берләштерә торган проект.

Программа эчтәлеге белән танышып узыйк:

– Экстремаль спорт төрләре буенча ярышлар һәм остаханәләр: самокат, ВМХ һәм скейтбординг.

 – Урам биюләре фестивальнең алыштыргысыз бер өлешен тәшкил итәчәк. Ике юнәлеш буенча баттл оештырылачак: брейкинг һәм All styles. Жюри әгъзалары ролендә чакырылган диджейлар, алып баручылар һәм хореографлар булачак.

– Баскетбол буенча турнирда төрле яшьтәге уенчылар катнаша алачак. Ярышлар махсус әлеге уен төре өчен әзерләнгән мәйданда узачак.

Шулай ук фестивальгә килүчеләр өчен граффити-зона, иҗади остаханәләр, интерактив мәйданчыклар, фудкорт тәкъдим ителәчәк.

Кич белән исә матур музыкаль чыгышлар көтелә.

Мондый шәп мөмкинлекне кулдан ычкындырмагыз, күрми калмагыз!

Фото: ясалма фәһем