КӨЧЛЕ САЛКЫННАРДА МӘКТӘПЛӘРДӘ ДӘРЕСЛӘР БУЛМАСКА МӨМКИН

Республикада көчле салкыннар булганда, укучылар өчен дәресләрне вакытлыча туктату температура күрсәткечләренә бәйле рәвештә карала.

Авыл мәктәпләренең башлангыч сыйныфларында һава температурасы –23 градуска кадәр төшкәндә дәресләр үткәрелми. Шәһәр мәктәпләренең башлангыч сыйныфларында һәм авыл мәктәпләренең 5–9 нчы сыйныфларында дәресләр –25 градуста гамәлдән чыгарыла.

Шәһәр мәктәпләренең 5–9 нчы сыйныф укучылары өчен чик –27 градусны тәшкил итә. Авыл мәктәпләренең 10–11 нче сыйныфларында дәресләр –30 градус, ә шәһәр мәктәпләрендә –32 градус салкын булганда үткәрелми.

Ата-аналарга һәм укучыларга һава торышын һәм мәктәп администрациясе хәбәрләрен игътибар белән күзәтеп бару сорала.