БДИ ТАПШЫРУ ПУНКТЛАРЫНДА МӘКТӘПЛӘРГӘ ҺӨҖҮМ ОЧРАКЛАРЫ ЕШАЮ СӘБӘПЛЕ САКЛАУНЫ КӨЧӘЙТӘЧӘКЛӘР

Бердәм дәүләт имтиханын (БДИ) тапшыру пунктларында мәктәпләргә һөҗүм очраклары ешаю сәбәпле куркынычсызлык чаралары көчәйтеләчәк. Бу хакта Рособрнадзор башлыгы Анзор Музаев хәбәр итте.

«Чыннан да, соңгы айларда мәктәп «шутерлары» артуы күзәтелә, һәм бу, әлбәттә, барыбызны да системаның ничек эшләвен тагын бер кат тикшерергә мәҗбүр итә. Әлбәттә инде, куркынычсызлыкка зур басым ясарга кирәк булачак», – диде ул.

Аның сүзләренчә, Росгвардия имтиханнар уздыру пунктларын саклауны дәвам итәчәк. Узган елларда БДИга бер көн кала хокук саклау органнары кинологлар белән биналарны тикшерде, дип өстәде ведомство башлыгы.