ХӘНИЯ ФӘРХИ ВАФАТ

2017 елның 27 июле күпләрнең хәтерендә калачак. Бүген Татарстанның һәм Башкортстанның халык артисты, бөтен татарларның яраткан җырчысы Хәния Фәрхи вафат булган. 30 май көнне 57 яшен бәйрәм иткән Хәния апа якты дөньядан китеп барыр дип кем уйлаган. Ничек кенә авыр булса да, Хәния апаның вафаты турындагы хәбәрне Татар дәүләт филармониясенең директоры К.Нуруллин раслаган.

Хәния Фәрхи бөтен татар дөньясының күңеленә "Әлдермешкә кайтам әле", "Кышкы чия" җырлары белән кереп калды.

Хәния апаны югалту кайгысын бүген тормыш иптәше Габделхәй, кызлары Алсу һәм Алия, оныклары Әминә, Ясминә һәм Рамазан кичерә.

Безнең редакция дә яраткан җырчыбызның туганнарының, якыннарының, тамашачыларының авыр кайгысын уртаклаша.