СТУДЕНТЛАР "ПРОЕЗДНОЙ" СОРЫЙ...

Студентларның сессиясе тәмамланырга өлгерми, аларны тагын бер җитди сынау көтә. Ул да булса – җәмәгать транспортында йөрү бәясе артуы. Студентлар арасында кызып-кызып фикер алышуга, шау-шуга бер этәргеч булды бу яңалык.

Хәзерге бәяләр гыйнвар ае ахырына кадәр генә гамәлдә. Әлегә җәмәгать транспортында йөрү өчен 25 сум түләргә кирәк, электрон кошелек белән түләсәң – 23 сум. Шулай ук 50 тапкыр баруны үз эченә алган "проездной"ны да кулланып була әле.

Тик февральдән башлап, автобус, троллейбус, трамвай яки метрода бер тапкыр бару өчен 27 сум чыгарып салырга туры киләчәк, электрон кошелек белән түләгәндә, ул 25 сум булачак. Татарстанның Тарифлар буенча дәүләт комитеты шундый бәяләр билгеләгән.

750 сумлык "проездной" бетерелә. Безлимит "проездной"лар кертелә: бөтен автобус маршрутына – 2300 сум, җир өстендәге электротранспортта теләсә ничә тапкыр йөрү – 1600 сум. Трамвай яки троллейбусның бер төрендә электрон-проездной билет 1500 сум торса, автобусның бер маршрутына 1300 сум тәшкил итәчәк.

Россиянең күп кенә шәһәрләрендә студентлар өчен җәмәгать транспорты белән файдалануда ташламалар каралган. Бу ташламалардан Мәскәү, Санкт-Петербург, Омск, Самара һәм башка күп кенә эре шәһәрләр студентлары куллана. Ни кызганыч, Казан еш кына студентлар каласы дип телгә алынса да, бу исемлеккә кермәгән. Казан белән бергә Татарстанның башка шәһәрләре – Яр Чаллы, Түбән Кама, Алабуга студентлары өчен дә ташламалы "проездной" юк.

50 тапкыр баруны үз эченә алган 750 сумлык "проездной" булганда студентларга азмы-күпме җиңелрәк иде. Тик хәзер анысын да бетерәләр, дигәне ишеткәч, студентларның зарланмыйча хәлләре юк. Шул сәбәпле Татарстан студентлары республика Хөкүмәтенә мөрәҗәгать итә дә инде. Алар, студентларга ташламалы "проездной" булдыртып, укырга бару, факультатив дәресләргә йөрер өчен уку чыгымнарын каплау мәсьәләсенең хәл ителүен тели.

Шул уңайдан “За студенческий проездной в республике Татарстан!” дип аталган петициягә имзалар җыю башланды. Әлеге документ Татарстан Республикасы Президенты, Дәүләт Советы рәисе, яшьләр эшләре һәм спорт министрына юнәлтелгән. Бу петициягә кул куючылар саны секунды-минуты белән артып тора. Әлеге язманы әзерләгән вакытка аңа 3685 кеше кул куйган иде инде.



Беренче булып әлеге мөрәҗәгатькә Татарстанның яшьләр эшләре министры Дамир Фәттахов комментарий бирде.

– Бүген студентларның проездной билеты мәсьәләсе тагын алгы планга чыкты. 2010 елда, ситуацияне анализлаганнан соң, транспорт гранты кебек альтернатива булдырылган иде. Аны ел саен республика буенча 6 мең студент алды. Ул юл чыгымнарын каплау өчен аена 1000 сум бирелүне күздә тота иде. Моның белән бергә Казанда 50 тапкыр баруны үз эченә алган 750 сумлык "проездной" гамәлдә иде, аерым ташламалы "проездной" белән булган ситуация дә андый кискен булмады. Хәзер, җәмәгать транспортында йөрү тарифлары үзгәргәч, бу студентлар тормышында да чагылачак. Бу очракта аларның мәнфәгатьләрен яклау – безнең өчен беренчел мәсьәлә. Хәзер без башка төбәкләр тәҗрибәсен өйрәнәбез, аның турында профиль юнәлешендәге хезмәттәшләребез һәм студентлар берләшмәсе белән фикер алышачакбыз һәм якын көннәрдә республика җитәкчелегенә үз тәкъдимнәребезне җиткерәчәкбез, – ди Дамир Фәттахов.

Министр әйтеп узган транспорт гранты исә, гадәттә, студентлар советында торган активистларга бирелә торган булган. Шуңа шәп укыган, әмма үзен студент советында актив күрсәтмәгән студентлар өчен бу грантны алу тормышка ашмаган хыял булып кала торган булган. “Әлеге грант студсоветтагы активистларга гына бирелде”, – дип сөйләде безгә КФУ студенты.

Кызыгы шунда: аена уртача 1700 сум стипендия алып яшәгән студент бу акчага проездной алсынмы, әллә ашау, өй кирәк-яраклары, уку әсбапларына тотсынмы? Шуңа өстәп, студент түләүле бүлектә укыса? Монда уйлап торасы да юк! Петициягә кул куясы һәм берәр үзгәреш булмас микән дип, көтәсе генә кала...




ФИКЕРЛӘР:


Айзирә Нургалиева, КИТТУ-КАИда магистратурада белем ала:

– Мин бу яңалыкка бик тискәре карыйм. Магистратурада читтән торып укыгач, укырга көн саен барырга туры килми килмәвен. Әмма эшкә барып җитәр өчен генә дә минимум 4 транспорт алыштырам. Ә университетка да барыга туры килгән көннәрне 6-7 транспортта йөрим дигән сүз. Бәя арту белән көн саен 200 сумнан да күбрәк акча китәчәк бит. Мин инде эшне алмаштырырга микән әллә, дип тә уйлыйм.

Алия Хәйруллина, КИТТУ (КХТИ), 2 курс студенты:

– Шәхсән үзем җәмәгать транспортында йөргәндә, ташламалы категориягә керәм. Әмма алга таба ташламалар белән нәрсә булып бетәчәге үземә дә кызык. Мәсәлән, төркемдәш кызларыма бик кыенга туры килә. Чөнки паралар Казанның төрле җирендә уза – Карл Маркс урамы, Себер таркты, Компрессорный платформасы янында. Икенче һәм өченче биналар якында гына – җәяү барып җитеп тә була. Ләкин кайбер вакытта паралар арасы 10 минут, ә җитешеп өлгерергә кирәк. Шуңа да бу яңа бәяләр безнең вузда укучыларга кыенлык тудырмый калмаячак.




Алинә МИННЕВӘЛИЕВА

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
  • 30 август 2020 - 17:15
    ҮЛЕМНӘН КӨЧЛЕРӘК – Ну-ну-ну! Марш, агай, үз урыныңа! Үз тавышын үзе танымады кыз. Тик тегенең тамчы да исе китмәде, атлап барган шәпкә ике кулын сузып, күрешергә килгән кыяфәт чыгарды. Тагын ике секундтан ул аны шул пычрак куллары белән эләктереп үк алачак... – Үзең китәсеңме, әллә булышыргамы сиңа, абзый кеше? Зөмәрә аңышмый калды: кайчан, каян килеп чыкты бу зифа буйлы егет, ни ара аларның уртасына кереп басты? Сәрхуш ирнең йөзе әче әйбер капкандай җыерылып килде; селтәнергә дип күтәргән кулы белән башын кашып алды да, ава-түнә үз почмагына таба китте.
    2472
    0
    15
  • 20 август 2020 - 16:57
    ЯЗМЫШЛАРНЫ САЙЛАП АЛМЫЙЛАР Энҗе, әнисе күрмиме икән, дип, курка-өркә өйләре ягына карап торды да, тиз генә мунчага кереп китте. Пычранган күлмәген мунча алдында салды да, эчкә кереп, салкынча суда нәни куллары белән ышкып-ышкып юарга тотынды. Эскәмиядә яткан хуш исле кул сабынын тидерде. Итәк очындагы таплар бетмәгәч, кырыйда торган кер тактасына салып тырышып-тырышып ышкырга кереште. Урам аша гына яшәгән күрше әби оялтты аны бүген.
    2310
    0
    13
  • 22 август 2020 - 09:00
    НУРЛАНЫШ БҮЛМӘСЕНДӘ ...Май кояшы җылы нурларын өләшә. Палатаның кечкенә тәрәзәсеннән төшкән саран нурлар Регинаның күзләренә төшеп күзләрен камаштыра, күзләре үзләреннән-үзләре яшьләнеп йомылалар. Яшьләнгән күзләрендәге җан сагышын башкаларга күрсәтмәскә тырышып, стенага борылып ятып, одеялын башыннан үк бөркәнеп куя да уйлар диңгезенә чума яшь ана.
    1958
    0
    8

Блоглар
  • МУСА ҖӘЛИЛ ИСЕМЕНДӘГЕ КӨРӘШ ЯРЫШЛАРЫ-2020 (ФОТОРЕПОРТАЖ)
  • CLUBTURBO WINTER DRIFT CUP ИКЕНЧЕ ЭТАП: ФОТОРЕПОРТАЖ
  • «ӘЙДӘ, ШАЯРТ»: ФИНАЛ
  • ТАТАР ИҖАДИ КОМАНДАЛАРЫ АРАСЫНДА МИНИ-ФУТБОЛ
  • РУБИН–ДИНАМО 0:1 (ФОТОРЕПОРТАЖ)
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019