«СОЗВЕЗДИЕ-ЙОЛДЫЗЛЫК» ФЕСТИВАЛЕНЕҢ ҖӘЙГЕ ИҖАДИ СМЕНАСЫ СТАРТ АЛА

16 июльдән Алушта шәһәренең «Сатера» балалар сәламәтләндерү лагеренда «Созвездие-Йолдызлык» җәйге иҗади сменасы старт алды. Татарстанның 24 муниципалитетыннан фестивальнең 210 лауреаты һәм җиңүчесе 15 көн ял итәчәк.

Диңгездә коенудан тыш, яшь артистлар өчен бик бай программа әзерләнгән, аңа экскурсияләр, фильмнар карау, квестлар, викториналар, кичәләр һәм спорт чаралары кертелгән. Һәр көн нәтиҗәләре буенча балалар арасында иң актив катнашучылар билгеләп үтеләчәк.

Моннан тыш, балалар бай эчтәлекле программаның белем бирү өлешенә дә актив җәлеп ителәчәк. Узган елларда фестиваль хәрәкәте җиңүчеләре, Россия театр сәнгате – ГИТИС институтында тәрбияләнүчеләр, шулай ук «Созвездие-Йолдызлык» Арт - резиденциясе артистлары да үз тәҗрибәләре белән уртаклашачак.

Сәфәрнең кульминацион мизгелләре – зур бәйрәм концертлары. 16 июльдә шуларның берсе «Артек» халыкара балалар үзәгендә узачак. 23 июльдә балалар Севастопольдә Кара диңгез хәрби-диңгез флоты диңгезчеләре алдында чыгыш ясаячак. Шулай ук «Йолдызлык» балалары кырымлылар өчен күпмилләтле Татарстанның төрле телләрендә җырлар, хореографик номерларда дөньяның төрле халыкларының бию традицияләрен күрсәтәчәкләр.