ЗУР ЭШЛӘР ЗУР ҖАВАПЛЫЛЫК ТАЛӘП ИТӘ

Дөньядагы иң сокландыргыч спорт төренең берсе – фигуралы шуу. Ул кешеләрне дулкынландыргыч мизгелләре белән җәлеп итә. Һәрбер номер спортчыларның тырышлыгы, тренерларның осталыгы һәм аларны беләштерүче кыйммәтле чыганак – вакытны таләп итә. Әлеге язмабызда сез фигуристка Дарья Дурандина белән әңгәмәне укып китә аласыз.

Ул фигуралы шуу белән 6 яшьтән шөгыльләнә башлаган. Тәүге тапкыр әлеге спорт төренә әтисе Дурандин Сергей Николай улы (футболчы) илткән.

Фото: Дарья Дурадинаның шәхси архивыннан алынды

– Тренировкалар ничек үтә?

– Башта, әлбәттә, җылынабыз, йөгерәбез, сикерәбез, аннары гына бозга керәбез.  Программаларны кабатлап чыккач, хаталар өстендә эшлибез һәм яңа элементлар, блоклар өйрәнәбез, азакта әйләнешне эшкәртәбез. Шулай ук хореография, сузу һәм биюләр дә бар.

– Нәрсәгә күбрәк игътибар бирәсең?

– Мөгаен, тартылугадыр (растяжка), аннан башка элементлар матур килеп чыкмый.

– Син хәзер нинди элементлар ясыйсың? (Икеле, өчле һ. б.)

– Өчле сикерүләрнең барысын да сикерәм, каскадларны өч+өч тотарга тырышам. Ультра сикерүләрдән өчле аксель һәм дүртле сальховны өйрәнәм.

– Җәрәхәтләр еш буламы?

– Батыр ярасыз булмый инде ул, барысы да әзерлектән тора. Дөресен генә әйткәндә, быелны күңелсезлекләр булып алды: ике каймыгу (вывих) һәм аппендицит. Хәзер барысы да яхшы, минем өчен сәламәтлек беренче урында.

– Фигуралы шуу белән шөгыльләнү өчен тормышыңның кайсы өлкәләрен арткы планга калдырып торырга туры килә? Бәлки шәхси тормыш яки югары калорияле продуктлардан баш тартып торасыңдыр?

– Миңа калса, минем уку арткы планга кала, чөнки барысына да җитешеп бетеп булмый. Ашауга килгәндә исә, анда барысы да стабиль, шоколадтан мин беркайчан да баш тартмаячакмын (көлә).

– Быел Россия Чемпионатында кемгә җан атачаксың?

– Кызлардан безнең җыелма команданың лидеры булган – Аделия Петросян өчен. Егетләрдән – Владислав Дикиджи өчен, аның сикерүләре һәм программалары ошый.

– Киләчәктә үзеңне кем итеп күрәсең? Фигуристка карьерасын дәвам итәсеңме?

– Мин тренер-хореограф булырга телим. Балаларны бик яратам. Хәзер инде әкренләп балаларны өйрәтү процессында.

Фото: Freepik.com