"СӘНИФӘ РАНГУЛОВА ТӘКЪДИМ ИТӘ"

Үземне Мартин Иденга охшатам

Джек Лондонның «Мартин Иден» әсәрен кат-кат укыдым. Иҗат кешесе өчен бик кирәк китап ул, мин анда үземне таныйм. Соңгы елларда мин нәкъ Мартин Иден инде менә. =) Иҗат кешесенең заман вәзгыяте белән бәрелеше, тырышлыкның әҗере аның кирәге беткәч кенә килү турындагы әсәр. Тагын мин Илдар Юзеевның мәхәббәт поэмаларын яратам.



Ул булган опера хитка әйләнә

Җырлардан бигрәк, опера тыңларга киңәш итәр идем. Чөнки анда симфоник музыка да бар, вокал да, артистлар уены да. Опера җырчыларыннан бигрәк тә Анна Нетребконы яратам ‒ үзе матур, үзе зәвыклы, юмор хисе бар, тавышы искиткеч, үзе актриса да. Ул катнашкан операны яшьләр, һичшиксез, яратырга тиеш кебек.



Хатын-кыз булып каласы килә

Нинди генә авыр чор булмасын, хатын-кыз матур, кызыклы булып калырга тырыша. Бу үзенчәлек, миңа калса, «Унесенные ветром» картинасында бик яхшы күрсәтелгән. Андагы хатын-кыз образын яратам мин, кешенең тырышлыгына, хатын-кыз көченә, тормышны яратуга мәдхия кебек ул.