Көчле магнит давыллары 2 көн дәвам итәчәк!

Бүген галимнәр планетабызга Кояш җиленең чираттагы көчле порциясе килеп җитәчәк, дип фаразлый. Магнит давыллары 2 көн буе дәвам итәчәк.

Шушы көннәрдә электрон җайланмаларның эшчәнлегендә тоткарлыклар килеп чыгарга мөмкин, техник аварияләр һәм катастрофалар саны да арта икән. Магнит давыллары кешеләргә сизелерлек уңайсызлыклар алып килә: баш авырта, басым уйный, йөрәк тибеше ешая, йокы кача, кәеф үзгәрә. Димәк, сәламәтлегегезгә саграк карарга кирәк!

Магнит давылы — Җир шарының Кояш өслегендә булган активлыкка реакциясе ул. Моның нәтиҗәсендә төрле тирбәлешләр барлыкка килә. Галимнәр фикеренчә, планетабызның 50% кешесе магнит давыллары басымын тоя.

Магнит давыллары вакытында сәламәтлегегезгә аеруча игътибарлы булырга кирәк. Түбәндәге кагыйдәләр сезгә зыян килүдән ярдәм итәчәк:

- Спорт белән артык мавыкмагыз;

- Йокыга җитәрлек вакыт калдырыгыз;

- Кофены яшел чәй белән алмаштырыгыз;

- Күбрәк су эчегез;

- Ванна яки контраст душ керегез;

- Алкоголь, никотин кулланмагыз;

- Барлык электрон җайланмаларны сүндерегез.