КАРА МӘЧЕНЕ ГАЕПЛӘМӘ!

Йә, дустым, бер мизгелгә генә күзеңне йом да мине табиб буларак күз алдыңа китер. Зу-уу-ур шприцлы һәм йөрәккә шом салучы кырыс йөзле итеп. Ха! Курыктыңмы?! Теге бик нык ашыккан чагыңда юлыңны кара мәче кискәндәге кебекме?


 IMG_1872Миссис Хорафатолог


Йокыдан торганда кайсысы белән басыйм, дип аякларың белән әке-бәке саныйсыңмы? Җомга көн 13е сиңа бомбалы кырда йөрү белән берме? Күзләреңне шар ачып, «әйе... әйе...», дип утырасыңмы бу мизгелдә? Димәк, миңа нәкъ менә син кирәк. Хорафатолог Зилә кунаклаган ашыгыч ярдәм машинасы ярдәмгә ашыга. «Вию-вию вию......»


Тозлы, писүкле Хорафатия иле


Хорафатларны ике төркемгә бүләм:


1) Тормышның бар ямен җибәрүче – тозсыз хорафатлар.


2) Яшәешебезгә бизәк булып торучы баллы хорафатлар.


Беренче очрак күпләргә таныш. Барасы җиреңә 15 метр ара калды, ди, тик... юлыңда, үч иткәндәй, кара мәче пәйда булды. Син инде, әлбәттә, борыласың да әйләнгечтән барырга мәҗбүр буласың. Нәтиҗәдә, соңга каласың!


Бәхет китерә торган күлмәк, галстук, чәч каптыргыч, чалбар, эшләпә – болар барысы баллы хорафатлар. Син үзеңнең киребеткән баш миеңә «бу кием миңа булыша, бу каптыргычтан уңай энергия бөркелә» дип сеңдерәсең. Һәм шулай килеп чыга да. Ә син моның ни өчен шулай килеп чыкканын чамалыйсыңмы? Чөнки хорафатка иярүчеләр теге яки бу предметның файда китерәчәгенә беренче итеп үз-үзләрен ышандыра.


Кара мәче эзләп йөрмә!


Кызык өчен генә берәр иртәңне көзге каршына басып, «бүген бар эшләрем да супер-пупер булачак, бернинди кара мәче дә, чәчелгән тоз да миңа комачаулый алмас», дип башлап кара әле. Аннан елмаеп ишекне ач һәм кабатланмас, төрле кызыкларга бай көнеңә рәхим ит! Ә шуның икенче көнендә сул аяктан торып, чыраеңны иң ачы лимон капкандай сыт һәм көне буе урам буйлап «кара мәче» эзләп йөр. Күңелсезлекләр сиңа гарантияләнә.


Тик бу очрактан да җиңел генә котылып була. Дарулардан сиңа «Елмайтигин», «Уңышцин» һәм «Күтәренке кәефгель» язып бирә алам. Кояш болытлар артына кача башлауга, шуларны эчеп, сылаштырып ят. Иң сөендергәне – шушы иң кирәкле антидепрессантларны без бушка алабыз. Өстәвенә, күпме куллансаң да, бетми, зыяны да юк. Үземдә сыналган.


«Карамәчефобия» йоктырган кешеләрIMG_1952


Алар да без сулаган һаваны сулый, без эчкән суны эчә. Алар безнең арада. Йәгез, шуларның кайберләре белән танышыйк әле.


Фирая Салиховна Мортазина (укытучы):


Хорафатларга яши-яши ышана башладым. Бу сыйфатым миннән кызларыма да күчте. Беркайчан да юлга чыгар алдыннан һәм туган көнемдә тырнак кисмим. Ә берчакны юлга чыгасым барлыгын онытып, тырнак кискән идем, нәтиҗәдә, акча янчыгым югалды. Йолдызнамәдә дә ул көнне юлга чыгарга киңәш ителми, диелгән булган. Анысын кичен генә күрдем.


Ә менә «кара мәче», җомга 13енә бөтенләй ышанмыйм. Инде бик күп еллар тату гомер итүче ирем белән дә нәкъ шул көнне өйләнештек.


Виктория Уваева (11нче класс укучысы):


Иң ышанган хорафатым җомга 13е иде. Ник «иде» дим, чөнки узган елгы туган көнемнән бирле бу хорафатка бүтән ышанмыйм. Туган көнем шушы көнгә туры килеп, иртәдән кичкә кадәр күңелем тыныч булмады, бу матур көнемне ни дә булса бозар кебек тоелды. Тик, бәхеткә, туган көнем хәвеф-хәтәрсез генә, мәңге истә калырлык булып узып китте.


100 процент дөрес хорафатлар


Хорафатолог буларак әйтәм: түбәндәге хорафатларга ышан, 10 кешенең 9ында алар чынга аша:


Әгәр дә укучылар матур итеп киенеп-ясанып, чәчәк тоткан икән, димәк, тиздән бәрәңге алыр чак;


Кояш яктасында кара түгәрәкләр пәйда булган икән, димәк, тәрәзәңне юар вакыт җиткән;


Баш өстеңнән күгәрченнәр оча? Көт тә тор: кер юарсың.


Әниең әтиеңә чыршыны җый, дип бәйләнми башлаган икән, димәк, өч көннән – Яңа ел.


Әллә шул 9 кеше арасында син дә бар?! :)


Хорафатларга ышану ул – үз-үзеңне ышандыру


Әйдә инде, әйдә, сора. Беләм бит инде нәрсә дип сорарга маташуыңны. Ышанаммы мин хорафатларга, юкмы? Американнар сыман, үземне хорафатларга ышанмаучылар рәтенә кертә идем. (Ник дигәндә, алар чәчәкнең җөп сандагысын да бүләк итә, өйләрендә дә рәхәтләнеп сызгырып йөри). Язмамның төп максаты да – азмы-күпме хорафат чиренең билгеләре күзәтелгән кешеләрне бу сәер авырудан «дәвалау», хорафатларга артык ышанып китеп, күңелсезлекләргә юлыкмауларын булдырмау иде. Әмма мәкаләне язу барышында бу чирнең билгеләре үземдә дә ачыкланды.


Әйе, без үзебез дә сизмәстән хорафатларга ияреп яшибез, чөнки аларның кайберләре традицион рәвештә буыннан буынга күчеп килә. Мисаллар җитәрлек: кечкенә чагымда миңа гел «өстәлгә утырма, кечкенә каласың», дип тәкърарлыйлар иде, әллә шуңа буем кечкенә инде?


«Өстәлне кәгазь белән сөртмә, тавыш чыга». Хәтерлим әле, бервакыт сеңелләрем белән «сөртмә кәгазь белән» дия-дия аздан гына сугышып китмәгән идек. Хорафатларга ышану – ул, әйткәнемчә, үз-үзеңне ышандыру.


«Авыру» табибтан киңәшләр:


Күзәтүләрдән күренгәнчә, хорафат синдромы һәрберебездә күзәтелә икән бит. Димәк, нәтиҗә ясыйбыз:


1) Беркайчан да, ишетәсеңме, беркайчан да юлымны кара мәче бүлде әле, дип кире борылма. Кара мәченең бер гаебе дә юк, ул кара булып туам әле мин, дип тә йөрмәгән, йон төсен дә сайлап алмаган.


2) Баллы хорафатларга, әгәр дә алар сиңа, чыннан да, ярдәм итә икән, аз гына ышанып кара инде.


3) Мин язган дару һәм гельләрне кулланырга онытма :)


P.S. Чир китә, гадәт кала, диләр. Язмам кылларыңны кыймылдатмаган икән, мең гафу, мин әле чын хорафатолог түгел, өйрәнчек кенә. Колагыңа бер нәрсә генә пышылдыйм әле: борчылма, җомга 13е июньдә генә килә. Аңарчы вакыт бар әле. Иркенләп яшә. Тик алдыңны-артыңны карап йөр. Кара мәче чыгып, юлыңны кисә күрмәсен ;) Ә инде кисә-нитә калса, агачка өч тапкыр суккалап, җилкәң аша төкергәләп куй, файдасы тими калмас.


P.P.S. Борын төбендә – имтиханнар, хәлиткеч контроль эшләр. Куркынычмы?! Куркуны басар өчен бер генә хорафатны эшкә җигәргә киңәш итәм – укы һәм өйрән. Ни хикмәттер, күп укыган кеше имтиханны да уңышлы ерып чыга икән... Ни хикмәттер?


Зилә САБИТОВА


Гөлия ИМАМОВА фотолары


IMG_1963

Нравится
Комментарии (0)
Осталось символов:
Шәп укыла
  • 21 сентябрь 2019 - 20:55
    НИГЕЗ ЙОРТ Сания карчыкның бәгыренә төшкән сагыш иксез-чиксез иде. Бу сагышны бер генә үлчәмгә салып та, бер генә бизмәнгә куеп та булмыйдыр. Ул аны гүя утырган эскәмиясенә мәңгелеккә беркетеп куйган да үзе башка җаннар эзләп китеп барган. Шуңа күрәдерме, Саниянең күңеленә авыр булса да, аның җаны тыныч иде...
    2646
    1
    55
  • 22 сентябрь 2019 - 14:14
    ВӘСИЛӘ Күпләр өчен мәктәпнең ямен алып китте Вәсилә апалары. Шул китүеннән башка килә алмады Вәсилә яраткан мәктәбенә. Авыр чир утыз ике яшьлек чибәр хатынны, аяктан яздырып, урынга беркетте. Көннән көнгә сүнә барды Вәсилә, корый барды. Хастаханәдә дә аңардан тиз баш тарттылар. Үзенә берни әйтмәсәләр дә, табиблар Вәсиләнең ире Ниязны ачыктан-ачык кисәттеләр: “Без ярдәм итәрлек түгел...” Бианасы Кәримә карчык киленен им-томлап та карады. Тик Вәсиләне аягыннан еккан авыр чир китәргә килмәгән иде шул. Айлар буе ятты да ятты урында Вәсилә. Берни аңламаган биш яшьлек кызы Ләйлә белән аңардан да кечерәк улы Фәрит кенә: “Әни, тор инде. Кайчан мәктәпкә барасың?”, - дип җанын кыйдылар.
    2099
    1
    26
  • 26 сентябрь 2019 - 15:08
    ПЕРӘ Вәсил бүген дә иртә таңнан, әнисе урыныннан кузгалып кыштыр-мыштыр йөри башлауга ук, йокысыннан торып утырды. Әнә ул инде кичтән үк әзерләп куелган утыннарны мичкә тутырып, ут үрләтеп җибәргән, сыерны савып кереп, сөтен дә сөзеп куйган. Менә хәзер самавырга чиләктән су салыр, торбасына яңа өлгергән кузлы күмерләрне өстәп җибәрер. Мичтә дөрләгән ялкынга, самавыр торбасы «тәрәзәчек»ләреннән күз кыскан кузларга карап утырырга ярата ул. Улының иртәләрен әнә шулай онытылып, утларны күзәтеп утыруын әнисе сизми диярлек. Сизеп тә игътибар итмиме? Комачауламагач, ярый, утырсын инде, ихтыяры, дияме?
    1851
    0
    14
  • 12 октябрь 2019 - 11:30
    БУШ ЙОРТ Туганыннан артык күреп яраткан күршесе Зөһрә карчык үлеп, өч-дүрт ел үтүгә, аның өен авылның теге башында яшәгән ике балалы, яше утыздан арткан Зөлфәт сатып алгач, ялгызы яшәп яткан Гөлсемнең тынычлыгы югалды. Зөлфәтнең авыл халкына ясаган этлекләрен күреп-ишетеп белгән хатын, яңа күршеләре белән бик якыннан аралашмаса да, йорт-бакчалары терәлеп торгач, алардан качып та яши алмады.
    1830
    0
    15
  • 10 октябрь 2019 - 16:48
    ТУКТАЛЫШ “Тизрәк! Тизрәк!..” Кыска гына мизгелгә аңына килгән Айдар үз янында кайнашкан ак халатлы кешеләрнең кем икәнлеген дә, кая ашыкканнарын да аңламыйча, бөтен тәненә таралган кискен авыртудан тагын аңын җуйды... Тукталышта юл аша чыгарга басып торганда килеп бәрелгән машинаны ул хәтерләмәде. Изелгән аякларын бот төбеннән кисәчәкләрен белми иде әле утыз тугыз яшьлек авыл укытучысы...
    1739
    2
    24

  • 23 сентябрь 2019 - 15:32
    ЖВАЧКА: "БҮГЕН МИНЕМ ТУГАН КӨН!" Бүген без көненә берәр пачка чәйни торган ЖВАЧКАның туган көне. Аңа ничә яшь дип уйлыйсыз? Ничек уйлап тапканнар? Хәзер беләбез!
    149
    0
    0
  • 27 август 2019 - 11:02
    РОССИЯДӘ ШӘП ФИЛЬМ ТӨШЕРӘ БЕЛӘЛӘР! 27нче август – Россия кинематографиясе көне. Россиядә, Совет чорында төшерелгән фильмнарга карата шикләнеп караучылар шактый, әмма син андыйлардан булсаң, бу язманы ябып куярга ашыкма, чөнки Россия кинематографиясе “Ёлки”, “Притяжение”, “Бабушка лёгкого поведения” ише чүп-чардан гына тормый. Һәм без сиңа блогер Badcomedian фикеренчә иң яхшы 5 рус телле фильм тәкъдим итәбез!
    218
    0
    2
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019